Міжнародны спецыялізаваны форум па тэлекамунікацыях, інфармацыйных і банкаўскіх тэхналогіях "ТІБО-2016"

Больш як 100 кампаній з 18 краін свету, перадавыя распрацоўкі і эксклюзіўныя навінкі ў сферы інфармацыйных тэхналогій і камунікацыі, дзясяткі мерапрыемстваў з удзелам вядучых міжнародных экспертаў... У Мінску з 19 па 22 красавіка праходзіць ХХIII Міжнародны спецыялізаваны форум па тэлекамунікацыях, інфармацыйных і банкаўскіх тэхналогіях "ТІБО". У ліку гасцей – генеральны сакратар Міжнароднага саюза электрасувязі Хоўлінь Чжао, генеральны дырэктар Выканкама Рэгіянальнай садружнасці ў галіне сувязі Нурудзін Мухітдзінаў, кіраўнік занальнага аддзялення Міжнароднага саюза электрасувязі для краін СНД Аразабек Кайыкаў...

За мінулыя дзесяцігоддзі мінскі форум пацвердзіў статус аднаго з найбуйнейшых ва Усходняй Еўропе па гэтай тэматыцы. І ў гэтым годзе ён, па традыцыі, аб'ядноўвае адразу некалькі маштабных мерапрыемстваў: XXIII Міжнародную спецыялізаваную выстаўку "ТІБО-2016", II Выстаўку робататэхнікі і перадавых тэхналогій, XXIII Беларускі кангрэс па тэхналогіях інфармацыйнага грамадства, а таксама прэстыжны штогадовы конкурс "Інтэрнэт-прэмія "ТІБО-2016".

Дарэчы, як заўважыў на адкрыцці міністр сувязі і інфарматызацыі Беларусі Сяргей Папкоў, у 2016-м "ТІБО" прыкметна змяніў фармат: "Калі раней ён праходзіў як выстаўка дасягненняў у галіне тэлекамунікацый, то сёння трансфармаваўся менавіта ў выстаўку развіцця інфарматызацыі, у дэманстрацыю крокаў у галіне ІКТ"...

Экспазіцыя "ТІБО-2016" прадстаўляе некалькі тэматычных напрамкаў з улікам прыярытэтаў развіцця Беларусі ў галіне ІКТ: "Нацыянальная інфармацыйная інфраструктура", "Лічбавая эканоміка", "Электронны ўрад і электроннае ўзаемадзеянне", "ІКТ у сацыяльна-культурнай сферы", "Стратэгія лічбавай трансфармацыі", "Робататэхніка", "Лічбавыя тэхналогіі ў паліграфічнай і выдавецкай дзейнасці". Сёння ў рэйтынгу Міжнароднага саюза электрасувязі па індэксе развіцця інфармацыйна-камунікацыйных тэхналогій Беларусь займае 36-е месца, уваходзіць у топ-10 краін, якія найбольш дынамічна развіваюцца, і, на думку Хоўлінь Чжао, краіна можа дэманстраваць яшчэ большы рост.

Зразумела, усё самае цікавае – распрацоўкі і тэхналогіі, якія наведвальнікі могуць убачыць і пратэсціраваць – прадстаўлены на пляцоўках выстаўкі "ТІБО-2016" у Футбольным манежы. У цэнтры ўвагі – дэманстрацыя развіцця электроннага ўрада Беларусі. Нямала навінак і ў кампаній. Воблачны аператар beCloud разгарнуў тэсціраванне сеткі 4,5G, якая дае магчымасць карыстацца інтэрнэтам на скорасці да гігабіта ў секунду. У вядучых мабільных аператараў краіны – лічбавы подпіс на SIM-картцы (Velcom), анлайнавае тэлебачанне для смартфонаў, планшэтаў, камп'ютараў і тэлевізараў (МТС). Холдынг "Гарызонт" прэзентаваў праекты "Разумныя прыпынкі", "Разумныя паркоўкі" і іншыя інтэлектуальныя сістэмы для эканоміі часу і рэсурсаў. На стэндзе "Белпошты" - "Паштовае аддзяленне сувязі XXI стагоддзя" з акцэнтам на самаабслугоўванне...

Рэпартаж з "ТІБО-2016" – у галерэі Belarus.by...