Студзень-2026 у Беларусі: экстрэмальныя снегапады, марозныя сонечныя дні і чароўныя халоднай прыгажосцю прыродныя ландшафты

Студзень-2026 яшчэ не завяршыўся, але ўжо ўвайшоў у гісторыю метэаназіранняў краіны рэкорднымі снегападамі і маразамі. І ўсё ж нягледзячы на камунальныя цяжкасці, многія жыхары зноў – як у дзяцінстве! – адчулі захапленне ад высокіх снежных сумётаў, яшчэ не пратаптаных пешаходных дарожак, зіхатлівага рыпучага снегу. А маразы, якія ўдарылі пасля праваслаўнага Раства, дапоўнілі абрысы гэтай дзівоснай зімовай казкі вытанчанымі лядовымі ўзорамі на гарадскіх і прыродных пейзажах.

Здзівіў беларусаў магутны цыклон "Улі", які сфарміраваўся над Міжземным морам і прынёс 8-9 студзеня ва ўсе рэгіёны інтэнсіўныя завеі і моцныя вятры з парывамі 15-18 м за секунду. Вышыня снежнага покрыва на большай частцы тэрыторыі дасягнула 6-30 см, а месцамі – 31-42 см! Так, напрыклад, у Магілёве пабіты абсалютны максімум месяца па колькасці ападкаў за суткі – 31 мм! Сіноптыкі звярнулі ўвагу, што за гісторыю метэаназіранняў найбольшая колькасць ападкаў зарэгістравана ў студзені 2007 года, калі ў сярэднім па Беларусі выпала 78 мм ападкаў. У Мінску ж максімальная колькасць ападкаў за студзень выпала ў 1915 годзе – 135 мм.

Толькі развітаўшыся з "Улі", які па сіле параўноўваюць з яго снежным братам "Хаўерам", што абрынуўся на Беларусь у сакавіку 2013 года, беларусы адчулі сапраўдныя сібірскія маразы. Паводле інфармацыі сіноптыкаў, 14 студзеня на метэастанцыі Вялікага Межніка зафіксавана мінімальная тэмпература паветра ў нашай краіне – мінус 29,6°С. Такіх нізкіх тэмператур на тэрыторыі Беларусі не адзначалі амаль пяць гадоў. У раёне аграгарадка Возера Уздзенскага раёна слупок тэрмометра апусціўся да мінус 20°C. Згодна з прагнозам, марознае і сухое надвор'е захаваецца практычна да канца студзеня.

На здымку: зубры ў ландшафтным заказніку "Азёры". Фота Леаніда Шчаглова