Абрад "Калядныя цары" – нематэрыяльная спадчына Беларусі

На адзін дзень у годзе, 13 студзеня, аграгарадок Семежава Капыльскага раёна ператвараецца ў самую сапраўдную сцэну: тут праходзіць не толькі калядны кірмаш з дэгустацыяй страў мясцовай кухні, але і ўнікальны абрад з багатай гісторыяй – "Калядныя цары".

Абрад з'яўляецца нематэрыяльнай спадчынай Беларусі і ўключаны ў Спіс сусветнай спадчыны ЮНЕСКА. Гісторыя абраду адыходзіць каранямі ў XVIII стагоддзе, калі недалёка ад Семежава стаялі часці царскай арміі. Згодна з паданнем, у дні святкавання Новага года салдаты і афіцэры хадзілі па дварах, прадстаўляючы вясёлае дзейства, за што гаспадары адорвалі іх пачастункам. У абрадзе ўдзельнічаюць маладыя мужчыны і юнакі – "цары", якія, перамяшчаючыся па вясковай вуліцы, уваходзяць у хату і разыгрываюць гісторыка-рэлігійную драму "Цар Максіміліян" з "батальнымі" сцэнамі, сакрэтамі народнага лячэння. А з надыходам цемры "цары" запальваюць паходні.