Беларускія веласіпедысты заваявалі 15 залатых узнагарод дамашняга Кубка мацнейшых

Міжнародны турнір па веласпорце на трэку "Кубак мацнейшых спартсменаў" адбыўся 15 – 19 красавіка на веладроме "Мінск-Арэны". У агульнай колькасці за пяць дзён гаспадары спартыўнага спаборніцтва выйгралі 39 медалёў: 15 залатых, 12 сярэбраных і 12 бронзавых.

Удзел у спаборніцтвах прынялі каля 150 гоншчыкаў з Беларусі і Расіі. У заключны дзень турніру адбыліся чатыры фіналы. У жаночым мэдысане – парнай гонцы на вынослівасць – перамогу атрымалі беларускі Ганна Церах і Паліна Конрад, другое і трэцяе месцы занялі прадстаўніцы Расіі. У гэтым жа відзе праграмы ў хлопцаў золата і серабро заваявалі расійскія дуэты, бронзу ўзялі нашы Дзяніс Мазур і Сяргей Шаўчэнка.

У кейрыне ў дзяўчат поспех святкавала беларуска Варвара Басякова, другі рэзультат паказала яе суайчынніца Ангеліна Шастак. Пераможцам у мужчынскім спрынце стаў расіянін Даніла Бурлакоў, які ў фінале быў хутчэйшым, чым наш Арцём Зайцаў.