Школа №4 у Мінску

Гісторыя сярэдняй школы №4 у Мінску пачалася ў 1906 годзе з адкрыцця прыватнай мужчынскай гімназіі С.П. Зубакіна і К.В. Фальковіча, якая размяшчалася на месцы цяперашняга гістарычнага факультэта БДУ на вул. Скобелеўскай, 8. У 1918 годзе гімназія была пераўтворана ў 4-ю школу другой ступені, а ў 1921 годзе атрымала статус сямігадовай школы. У 1934 годзе  ўстанове прысвоілі імя С.М. Кірава.

З 1936 года школа займае будынак на вул. Чырвонаармейскай, 11, спраектаваны архітэктарам Герасімам Якушкам у стылі постканструктывізму. У час Вялікай Айчыннай вайны будынак школы быў цалкам разбураны, але ў 1947 годзе яго аднавілі. У 1979 годзе да асноўнага корпуса прыбудавалі шасціпавярховы будынак, школа атрымала статус установы з музычным ухілам. З 2009 года музычныя прадметы выкладаюцца на факультатыўнай аснове.

У ходзе рэстаўрацыі асаблівая ўвага ўдзелена захаванню гістарычнага аблічча будынка, пры гэтым выкарыстоўваліся сучасныя тэхналогіі. Рэканструкцыя ўключала ў сябе ўзмацненне фасада, аконных праёмаў і прасценкаў з дапамогай металічнага каркаса. Цалкам заменены дах, уключаючы кроквенную сістэму і фальцавае пакрыццё. Абноўлены ўсе ўнутраныя інжынерныя камунікацыі. Устаноўлены сучасныя драўляныя вокны са шклопакетамі. Фасад будынка атынкаваны з аднаўленнем гістарычных элементаў.