Спаборніцтвы па парусным спорце ў Гродзенскім раёне

Адкрыты чэмпіянат і абласныя спаборніцтвы па парусным спорце 2 – 8 жніўня адбыліся у Гродзенскім раёне на возеры Кань.

Спаборніцтвы аб'ядналі амаль 65 спартсменаў ва ўзросце ад 8 да 22 гадоў. Гэта прадстаўнікі СДЮШАР па водных відах спорту Мінска, Рэспубліканскага цэнтра алімпійскай падрыхтоўкі па вяслярных відах спорту і Гродзенскай абласной СДЮШАР прафсаюзаў "Нёман".

"У чэмпіянаце прадстаўлены алімпійскія віды праграм: "Лазер-Радыял" жаночы і "Лазер-Стандарт" мужчынскі. Усе астатнія класы, пачынаючы для нашых юных спартсменаў, – "Кадэт", "Аптыміст", "Лазер 4.7", "Прамень-міні" і гэтак далей – гэта ўжо абласныя спаборніцтвы", – расказаў трэнер-выкладчык СДЮШАР "Нёман" Дзмітрый Дзягель і дадаў, што месца правядзення спаборніцтваў цікавае. "Берагі тут высокія, мяняецца часта вецер, што дае магчымасць гродзенцам навучыцца бачанню ветру. Кожную хвіліну ў нас мяняюцца ўмовы. Калі ж мы прыязджаем у Мінск, то там, наадварот, вецер больш роўны, вадаём больш вялікі. Там ужо раскладваць пазіцыі свае менавіта ў гонцы значна прасцей", – адзначыў Дзмітрый Дзягель.