Навіны 
У Мінску адкрыўся Нацыянальны футбольны стадыён
7 Чэр 2025
Прэзідэнт Беларусі Аляксандр Лукашэнка 7 чэрвеня адкрыў Нацыянальны футбольны стадыён у Мінску.
Для Мінска гэта не першы маштабны спартыўны аб'ект, які будавалі нашы сябры з Кітая. Літаральна паўгода таму ў сталіцы адкрыўся самы вялікі басейн у Беларусі. А сёння – самы ёмісты стадыён з больш чым 33 тысяч месцаў для гледачоў.
Арэна цалкам адпавядае крытэрыям для атрымання 4-й катэгорыі УЕФА. Гэта значыць, што тут можна праводзіць матчы чэмпіянатаў свету і Еўропы, Лігі чэмпіёнаў і Лігі Еўропы, Суперкубка УЕФА. Але тут будуць праходзіць не толькі міжнародныя матчы высокага ўзроўню, але і гульні нацыянальнага першынства.
Стадыён аснашчаны самай сучаснай тэхнікай. Падагрэў поля, сістэма паліву, святлодыёдная падсветка, два вялікія экраны – гэта далёка не ўсе характарыстыкі новай футбольнай арэны ў сталіцы. Каля ўвахода на стадыён – сімвалічная скульптура з беларускім і кітайскім футбалістамі.
Цырымонія адкрыцця таксама атрымалася сімвалічнай. Месца знайшлося і беларускаму, і кітайскаму каларыту. Згадзіцеся, нячаста можна ўбачыць кітайскага артыста, які на чыстай беларускай мове спявае знакамітую "Купалінку". А потым нашу артыстку, якая спявае на такой жа чыстай кітайскай мове. А на фоне гэтага незвычайнага выступлення пранеслі кітайскага дракона.
І хоць адкрыццё стадыёна прадугледжвае афіцыёз, Прэзідэнт вырашыў сказаць па-чалавечы, ад душы. Думка аб тым, што на Партызанскім праспекце было б нядрэнна пабудаваць стадыён, прыйшла Аляксандру Лукашэнку даволі даўно. Рэалізаваць яе дапамог старшыня КНР Сі Цзіньпін. А атрымалася гэта вось так...
"Было прынята рашэнне наконт будаўніцтва тут Нацыянальнага стадыёна. І аднойчы ў Пекіне, ведучы перагаворы са сваім старым, але вельмі надзейным сябрам – Старшынёй КНР Сі Цзіньпінам, я пачаў гэту размову. І ён так па-кітайску (кітайцы - людзі вельмі спакойныя, узважаныя) у канцы таго, як я падзяліўся думкамі, сказаў: мы падумаем", - расказаў беларускі лідар.
Вядома ж, Прэзідэнт гаварыў і пра сам футбол. Не сакрэт, што Аляксандр Лукашэнка ў маладосці захапляўся менавіта гэтым відам спорту. І яму, як і любому футбольнаму балельшчыку, хацелася б бачыць дастойныя вынікі нашай зборнай.
"Спадзяюся, узровень гульні нашых клубаў і асабліва зборных будзе адпавядаць створаным для іх умовам", – сказаў Прэзідэнт. Бо беларусы ўмеюць гуляць – выхад нашай зборнай па пляжным футболе ў фінал Чэмпіянату свету добра гэта паказаў.
Сімвалічны ключ, які перадаў беларускаму лідару віцэ-прэзідэнт Алімпійскага камітэта КНР Чжан Цзяшэн, Аляксандр Лукашэнка ўручыў футбалістам нашай маладзёжнай зборнай па футболе. Футбалісты маладзёжнай зборнай Беларусі згулялі ўнічыю з камандай Кітая ў таварыскім матчы ў Мінску – 1:1.
© BELARUS.BY,
2009 - 2025