"Прарыў Перамогі": патрыятычная акцыя ў мемарыяльным комплексе "Прарыў" ва Ушацкім раёне

Патрыятычная акцыя "Прарыў Перамогі", прысвечаная 81-й гадавіне прарыву варожай блакады партызанамі Полацка-Лепельскай зоны, адбылася 2 мая ў мемарыяльным комплексе "Прарыў" ва Ушацкім раёне.

У гэтым годзе змяніўся фармат маштабнага свята, на якое збіраліся жыхары не толькі Ушацкага раёна і Віцебскай вобласці, але і госці з іншых рэгіёнаў, а таксама Расіі. Абласная патрыятычная акцыя "Прарыў Перамогі" адбылася ўжо 10-ы раз і прайшла ў два этапы. Першым мерапрыемствам стала адкрыццё пасля рэканструкцыі помніка воінам і партызанам у вёсцы Паулле. Пасля гэтага дзеянне перамясцілася на асноўную лакацыю – мемарыяльны комплекс "Прарыў".

Мерапрыемствы ў мемарыяльным комплексе разгарнуліся ўвечары: тут адбыўся мітынг-рэквіем і канцэрт. Днём сабраліся выхаванцы ваенна-патрыятычных клубаў Віцебшчыны, Пскоўшчыны і Смаленшчыны. На маладзёжным злёце юнакі і дзяўчаты ўдзельнічалі ў розных гульнях, квэстах, а потым выступілі на пляцоўцы мемарыяльнага комплексу разам з іншымі творчымі калектывамі з Ушацкага раёна і Віцебска. Пасля канцэрта пад салют зводны і імправізаваны хор удзельнікаў мерапрыемства выканаў песню "Дзень Перамогі".