"Студзеньскія музычныя вечары" адкрылі святочны год 1000-годдзя Брэста
Ужо больш за тры дзесяцігоддзі міжнародны фестываль класічнай музыкі – візітка горада над Бугам – становіцца першай вялікай падзеяй культурнага календара Брэста. Але на гэты раз у яго яшчэ больш ганаровая місія! Цяперашнія "Студзеньскія музычныя вечары" адкрылі святочны марафон, прысвечаны грандыёзнаму юбілею – тысячагоддзю Брэста, аднаго з найстарэйшых гарадоў Еўропы. Больш таго, 2019-ы ён праводзіць у статусе культурнай сталіцы СНД.
Увечары 9 студзеня ў зале Брэсцкага акадэмічнага тэатра драмы адкрыццё сабрала сотні аматараў музыкі, у тым ліку прадстаўнікоў кіраўніцтва вобласці і горада, дыпламатычнага корпуса, духавенства. З прывітаннем выступілі мэр Брэста Аляксандр Рагачук і намеснік міністра культуры Беларусі Сяргей Шарамецьеў. А далей загучала цудоўная музыка!
Фестываль пачаўся ўверцюрай да оперы Расіні "Сарока-зладзейка" ў выкананні Нацыянальнага акадэмічнага сімфанічнага аркестра Белтэлерадыёкампаніі пад кіраўніцтвам Аляксандра Сасноўскага. Шэдэўры сусветнай класікі – арыі з опер Чайкоўскага, Дворжака, Вэрдзі, Сен-Санса – гучалі галасамі тэнараў італьянскага La Scala Джані Манджардзіна і Альда Капута, артыстаў маладзёжнай опернай праграмы Вялікага тэатра Расіі Тамуны Гачашвілі, Вікторыі Каркачавай і Алуда Тодуа.
Сюрпрызам першага музычнага дня стала выступленне польскай опернай дзівы Іааны Наўрот і гітарыста-віртуоза Тома Сінатры (Італія). Пляменнік знакамітага амерыканскага спевака і шоўмена прыехаў у Брэст упершыню. І ў першы фестывальны дзень на незапланаванай прэс-канферэнцыі падзяліўся ўражаннямі: "Я адчуваю тут асаблівую атмасферу. Гэты горад дыхае культурай. Я адчуваю, што магу застацца даўжэй, каб паглядзець музеі і азнаёміцца з самім горадам".
Геаграфія ўдзельнікаў 31-х "Студзеньскіх музычных вечароў" – Беларусь, Расія, Грузія, Італія, Японія і іншыя – усяго 10 краін. Кіраўнік і заснавальнік фестывалю, заслужаны дзеяч мастацтваў Лілія Батырава адзначыла, што ў афішы ёсць як імёны, якія не маюць патрэбы ў прадстаўленні, так і маладыя таленты. Джаз, мадэрн, новыя прачытанні класічных твораў – паклоннікі змогуць цалкам акунуцца ў любімыя рытмы. Акрамя галоўнай сцэны, артысты выступяць у касцёлах і на пляцоўках малых гарадоў, а фінальным акордам стане раскошны калядны баль.
