Дзень Дзяржаўнага сцяга, герба і гімна Рэспублікі Беларусь

Традыцыйна 14 мая на плошчы Дзяржаўнага сцяга ў Мінску адбылася штогадовая цырымонія прынясення маладымі грамадзянамі нашай краіны клятвы вернасці дзяржаўным сімвалам Рэспублікі Беларусь.

Для ўдзелу ва ўрачыстым рытуале на плошчы сабраліся некалькі тысяч чалавек, сярод якіх было асабліва шмат моладзі. Пад гукі сумеснага выканання гімна рота ганаровай варты ўнесла на плошчу вялізнае палотнішча Дзяржаўнага сцяга Беларусі і выяву герба. Ад імя маладога пакалення Беларусі клятву вернасці дзяржаўным сімвалам далі прадстаўнікі моладзі з усіх абласцей і Мінска. Творчыя нумары патрыятычнай тэматыкі, адпавядаючыя духу і настрою свята, падрыхтавалі маладзёжныя калектывы, якія таксама прадстаўляюць кожную з абласцей Беларусі і Мінск.

Гэта свята ўстаноўлена Указам Прэзідэнта Беларусі ад 26 сакавіка 1998 года і адзначаецца штогод у другую нядзелю мая. У адпаведнасці з артыкулам 19 Канстытуцыі Рэспублікі Беларусь сімваламі нашай краіны як суверэннай дзяржавы з'яўляюцца Дзяржаўны сцяг, Дзяржаўны герб і Дзяржаўны гімн. Эталон герба і Палажэнне аб сцягу зацверджаны Указам Прэзідэнта Рэспублікі Беларусь ад 7 чэрвеня 1995 года па выніках праведзенага 14 мая 1995 года рэспубліканскага рэферэндуму.

5 ліпеня 2004 года быў прыняты Закон Рэспублікі Беларусь "Аб дзяржаўных сімвалах Рэспублікі Беларусь", які вызначае апісанне і парадак іх выкарыстання. 12 красавіка 2023 года Аляксандр Лукашэнка падпісаў указ нумар 105, якім карэкціруецца ўказ ад 26 сакавіка 1998 года. Назва дзяржаўнага свята зменена з "Дзень Дзяржаўнага герба Рэспублікі Беларусь і Дзяржаўнага сцяга Рэспублікі Беларусь" на "Дзень Дзяржаўнага сцяга, Дзяржаўнага герба і Дзяржаўнага гімна Рэспублікі Беларусь".