Больш за 500 работ прадстаўлена на выставе "Калядная зорка" ў Мінску

У Нацыянальным цэнтры мастацкай творчасці дзяцей і моладзі 9 снежня адкрылася XXVI Рэспубліканская выстава-конкурс дэкаратыўна-прыкладной творчасці навучэнцаў "Калядная зорка".

Гэты мастацкі праект рэалізуецца цэнтрам з 1996 года і аб’ядноўвае ініцыятыўных таленавітых навучэнцаў і прафесійных педагогаў з усіх рэгіёнаў краіны для рэалізацыі творчых задумак і прэзентацыі найлепшых дасягненняў дзіцячай творчасці ў галіне дэкаратыўна-прыкладнога мастацтва.

На выстаўцы прадстаўлены аўтарскія лялькі, мяккія цацкі, кампазіцыі на калядную тэматыку, навагоднія касцюмы, сувеніры і падарункі да Новага года з розных матэрыялаў – больш за 500 індывідуальных і калектыўных творчых работ навучэнцаў аб’яднанняў па інтарэсах з розных куткоў краіны. Яны выкананы ў розных відах і тэхніках дэкаратыўна-прыкладной творчасці: выцінанка, мастацкая саломка, лозапляценне, мастацкі роспіс, кераміка, бяроста, вышыўка, ткацтва, габелен і інш.