Парламенцкія выбары ў Беларусі

Паводле слоў Лідзіі Ярмошынай, у Брэсцкай вобласці плануюцца тэледэбаты ў 8 акругах з 16, у Гомельскай вобласці - у 10 з 17. У Гродзенскай вобласці тэледэбаты пройдуць толькі ў 3 акругах з 13. "Але гэта, вядома, прырост, калі ўлічыць, што чатыры гады таму ў Гродзенскай вобласці ні ў адной акрузе не адбыліся тэледэбаты. Хоць тры акругі таксама яўна малавата", - пракаменціравала старшыня ЦВК прыведзеныя даныя. У Мінскай вобласці дэбаты плануюцца ў 4 з 17 выбарчых акруг.

"Як вы ведаеце, ужо гэта колькасць не павялічыцца, можа толькі зменшыцца, таму што заяву на тэледэбаты трэба было падаваць адразу пасля рэгістрацыі, калі адбывалася жараб'ёўка эфірнага часу", - растлумачыла Лідзія Ярмошына.

Яна таксама праінфармавала, што за перыяд вядзення парламенцкай кампаніі ў Цэнтральную камісію паступіў 131 зварот, з іх 32 не адносяцца да выбараў. Многія звароты датычацца растлумачэння выбарчага заканадаўства, частка змяшчае скаргі, якія Лідзія Ярмошына ў асноўным ахарактарызавала як надуманыя.

Выбары ў Палату прадстаўнікоў Нацыянальнага сходу Беларусі адбудуцца 11 верасня. На 110 месц прэтэндуюць больш за 520 кандыдатаў у дэпутаты. Цяпер ідзе перыяд перадвыбарнай агітацыі, які прадугледжвае распаўсюджванне агітацыйнай прадукцыі, сустрэчы з выбаршчыкамі, выступленні па радыё і тэлебачанні, удзел у тэледэбатах, публікацыю перадвыбарных праграм у сродках масавай інфармацыі.