Парламенцкія выбары ў Беларусі
Саюзныя парламентарыі прымуць удзел у назіранні за выбарамі ў Беларусі
1 верасня, Масква /Эдуард Півавар - БЕЛТА/. Дэпутаты Парламенцкага сходу Саюза Беларусі і Расіі ў складзе місіі наглядальнікаў ад СНД 11 верасня прымуць удзел у назіранні за выбарамі дэпутатаў Палаты прадстаўнікоў Нацыянальнага сходу Беларусі, паведамілі БЕЛТА ў прэс-службе Парламенцкага сходу.
У дэлегацыю ўвойдуць шэсць дэпутатаў, якія прадстаўляюць абедзве палаты расійскага парламента, і супрацоўнікі сакратарыята Парламенцкага сходу. Узначаліць дэлегацыю саюзных парламентарыяў член камісіі Парламенцкага сходу па інфармацыйнай палітыцы, старшыня камітэта Дзяржаўнай думы па справах Садружнасці Незалежных Дзяржаў, еўразійскай інтэграцыі і сувязях з суайчыннікамі Леанід Слуцкі.
Дэпутаты наведаюць выбарчыя ўчасткі ў Мінску і ўсіх абласцях Беларусі, правядуць шэраг сустрэч з кіраўніцтвам Цэнтральнай камісіі Беларусі па выбарах і правядзенні рэспубліканскіх рэферэндумаў, абласных выбарчых камісій, з Надзвычайным і Паўнамоцным Паслом Расійскай Федэрацыі ў Рэспубліцы Беларусь Аляксандрам Сурыкавым, а таксама з прадстаўнікамі абласных заканадаўчых і выканаўчых органаў улады.
12 верасня прадстаўнікі місіі наглядальнікаў ад СНД правядуць прэс-канферэнцыю па выніках маніторынгу падрыхтоўкі і правядзення выбараў.
Пасля паведамлення афіцыйных рэзультатаў выбараў у Нацыянальны сход частка беларускіх дэпутатаў будзе дэлегавана ў Парламенцкі сход. У адпаведнасці з дагаворам аб стварэнні Саюзнай дзяржавы Расію і Беларусь у Парламенцкім сходзе прадстаўляюць па 36 дэпутатаў ад парламентаў дзяржаў-удзельніц.
версія для друку
зрабіць стартавай
дабавіць у выбранае