Парламенцкія выбары ў Беларусі

14 ліпеня, Мінск /Кар. БЕЛТА/. Цэнтральная камісія Беларусі па выбарах і правядзенні рэспубліканскіх рэферэндумаў акрэдытавала 44 наглядальнікі ад Садружнасці Незалежных Дзяржаў пры правядзенні выбараў дэпутатаў Палаты прадстаўнікоў Нацыянальнага сходу Беларусі шостага склікання. Такая інфармацыя размешчана на афіцыйным сайце ЦВК, паведамляе БЕЛТА.

У тым ліку ад Міжпарламенцкай асамблеі дзяржаў - удзельніц СНД (МПА СНД) акрэдытаваны 8 наглядальнікаў.

Як паведамляў старшыня Выканаўчага камітэта - выканаўчы сакратар СНД, кіраўнік місіі наглядальнікаў ад Садружнасці Сяргей Лебедзеў, місія СНД па назіранні за парламенцкімі выбарамі ў Беларусі пачала сваю дзейнасць, доўгатэрміновыя наглядальнікі працуюць ужо ў цесным кантакце і з Цэнтрвыбаркамам, і з праваахоўнымі структурамі. Па меры набліжэння даты выбараў місія актывізуе сваю дзейнасць. Колькасць наглядальнікаў ад СНД павялічыцца. Колькасць кароткатэрміновых наглядальнікаў, як чакаецца, складзе амаль 300.