Галоўныя навіны

ЗША і Беларусь прынялі рашэнне аб аднаўленні дыппрадстаўніцтва на ўзроўні паслоў

17 верасня, Мінск /Уладзімір Мацвееў - БЕЛТА/. ЗША і Беларусь прынялі рашэнне аб аднаўленні дыппрадстаўніцтва на ўзроўні паслоў. Аб гэтым сёння заявіў намеснік дзяржаўнага сакратара ЗША па палітычных пытаннях Дэвід Хэйл на сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.

"Я хацеў бы перадаць прывітанне ад дзяржсакратара, які папрасіў мяне прыехаць, каб прысутнічаць на важным гістарычным моманце нашых двухбаковых адносін. Пасля нашай сустрэчы мы зробім заяву, што будзем абменьвацца пасламі пасля такой колькасці гадоў без паслоў", - сказаў Дэвід Хэйл.

"Мы згодны з вамі, што той стан спраў ненатуральны, ненармальны. І мы рады, што гэта глава завяршаецца. Мы закрываем гэты раздзел па прычыне тых крокаў, якія ваша краіна і вы асабіста зрабілі. Таксама адзначаем тое бачанне, якое вы прынялі на ўзбраенне - большай разнастайнасці як ва ўнутраных справах, так і ў адносінах са знешнім светам. Мы вельмі моцна падтрымліваем гэта бачанне і зробім усё магчымае, каб дапамагчы вам на гэтым шляху", - падкрэсліў намеснік дзяржсакратара ЗША.

Ён адзначыў, што ЗША гэта робяць не з мэтай спаборніцтва з нейкай іншай краінай, а толькі ў мэтах таго, каб патэнцыял двухбаковых адносін быў рэалізаваны ў поўнай меры. "А таксама таму, што нам вельмі дарагі гэты рэгіён і мы вельмі ўважліва ставімся да пагроз бяспецы. Таксама таму, што мы вельмі моцна падтрымліваем суверэнітэт і незалежнасць Беларусі", - дадаў Дэвід Хэйл.

версія для друку

зрабіць стартавай

дабавіць у выбранае