Галоўныя навіны

Жаночая зборная Беларусі выйграла чэмпіянат Еўропы па індорхакеі ў Мінску

27 студзеня, Мінск /Кар. БЕЛТА/. Жаночая зборная Беларусі па індорхакеі, перамогшы галоўных фаварытаў турніру, каманду Нідэрландаў у серыі булітаў з лікам 4:3 (асноўны час матчу 1:1), заваявала залатыя медалі чэмпіянату Еўропы, які завяршыўся ў Мінску, паведамляе карэспандэнт БЕЛТА.

Матч стартаваў з атак галандскай каманды, якая настойліва шукала шляхі да варот беларусак. Небяспечныя моманты ўзнікалі адзін за адным. Беларускі адказвалі фаварытам турніру контратакамі. Херман Круіс падтрымліваў інтэнсіўнасць гульні каманды пры дапамозе замен. Аднак уберагчы вароты да канца першага адрэзка матчу ў беларусак не атрымалася. Галандка Ліза Пост адкрыла лік, перамогшы Марыну Навіцкую ў блізкім баі пасля розыгрышу штрафнога-вуглавога.

У другім перыядзе каманда Нідэрландаў уступіла ініцыятыву беларускам, якія настойліва атакавалі абарончыя рэдуты саперніц, час ад часу непакоячы падапечных Хермана Круіса вострымі выпадамі. Тым не менш, гаспадарская дружына няспынна атакавала, падтрыманая шматлікай публікай, якая сабралася на трыбунах Палаца спорту. На радасць балельшчыкаў за 13 секунд да канца матчу Марына Нікіціна зраўнавала лік. Яна ж у серыі булітаў закінула вырашальны штрафны кідок.

Гэта вікторыя стала першай для нашых хакеістак. Раней жаночая нацыянальная зборная Беларусі па індорхакеі была двухразовым прызёрам чэмпіянатаў Еўропы: у 2016 і 2018 гадах дзяўчаты заваявалі бронзавыя ўзнагароды, у 2018-м каманда заняла таксама трэцяе месца на Кубку свету.

ХХ чэмпіянат Еўропы па індорхакеі (хакей на траве ў закрытых памяшканнях) сярод жаночых каманд праходзіў у Палацы спорту з 24 па 26 студзеня. Турнір з'яўляецца другім па значнасці пасля Кубка свету. Чэмпіянат стаў адборачным да сусветнага першынства 2021 года, куды адправіцца шэсць лепшых каманд Старога Свету.

Лукашэнка павіншаваў жаночую зборную Беларусі з перамогай на ЧЕ па індорхакеі

27 студзеня, Мінск /Кар. БЕЛТА/. Прэзідэнт Беларусі Аляксандр Лукашэнка павіншаваў жаночую нацыянальную каманду з перамогай на ХХ чэмпіянаце Еўропы па індорхакеі, што праходзіў у Палацы спорту ў Мінску. Аб гэтым БЕЛТА паведамілі ў прэс-службе беларускага лідара.

"На працягу ўсяго турніру ў барацьбе з лідарамі сусветнага рэйтынгу вы праявілі найвышэйшае спартыўнае майстэрства, цвёрды характар, камандную з'яднанасць і волю да перамогі, - гаворыцца ў віншаванні. - Няхай ваш поспех паслужыць прыкладам для іншых беларускіх спартсменаў".

Кіраўнік дзяржавы таксама выказаў удзячнасць трэнерскаму штабу і ўсім тым, хто ўнёс уклад у заваяванне зборнай Беларусі тытула чэмпіёнак Еўропы.

версія для друку

зрабіць стартавай

дабавіць у выбранае