Галоўныя навіны

Завяршыўся шматдзённы візіт Лукашэнкі ў Кітай

3 верасня, Пекін /Кар. БЕЛТА/. Завяршыўся шматдзённы візіт Прэзідэнта Беларусі Аляксандра Лукашэнкі ў Кітай, паведамляе БЕЛТА.

Кіраўнік дзяржавы 31 жніўня - 1 верасня прымаў удзел у пасяджэнні Савета кіраўнікоў дзяржаў ШАС, а таксама ў сустрэчы ў фармаце "ШАС плюс" у Цяньцзіні. Саміт быў самым маштабным за ўсю гісторыю аб'яднання - амаль 30 лідараў краін і інтэграцыйных структур. У сваіх выступленнях Аляксандр Лукашэнка падкрэсліў, што быць членам ШАС - гэта стратэгічны выбар Беларусі. Ён абазначыў ключавыя пытанні для ШАС як элемента новага міжнароднага парадку, падкрэсліў важнасць стварэння агульнай навукова-інавацыйнай прасторы ШАС і патрэбнасць у незалежным фінансавым механізме ШАС, падтрымаў ініцыятыву Кітая па глабальным кіраванні. Прэзідэнт Беларусі назваў пяць прыярытэтаў для сям'і ШАС: шматбаковасць, бяспека, устойлівае развіццё як аснова стабільнасці ў рэгіёне, харчовая бяспека, а таксама індустрыяльнае і навуковае развіццё.

Яшчэ адна важная міжнародная падзея - парад у Пекіне з выпадку 80-годдзя Перамогі над японскім мілітарызмам і заканчэння Другой сусветнай вайны. Аляксандр Лукашэнка ў ліку амаль трох дзясяткаў іншых высокіх гасцей прысутнічаў на ўрачыстасцях.

Прэзідэнт за час знаходжання ў Кітаі правёў не менш як два дзясяткі нефармальных сустрэч з рознымі міжнароднымі лідарамі. У тым ліку з лідарам КНДР Кім Чэн Ынам, прэм'ер-міністрам Індыі Нарэндрам Модзі, Прэзідэнтам Турцыі Рэджэпам Таіпам Эрдаганам, Прэзідэнтам Азербайджана Ільхамам Аліевым, Прэзідэнтам Інданезіі Прабова Субіянта, прэзідэнтамі Зімбабвэ і Конга Эмерсанам Мнангагвам і Дэні Сасу-Нгесо, з прэм'ер-міністрам Славакіі Робертам Фіца.

Асобная ўвага была ўдзелена беларуска-кітайскаму парадку дня, адбыліся перагаворы са Старшынёй КНР  Сі Цзіньпінам і сустрэча з членам Пастаяннага камітэта Палітбюро ЦК Кампартыі Кітая, сакратаром Сакратарыята і кіраўніком Канцылярыі ЦК КПК Цай Цы, некалькі сустрэч з бізнес-коламі, у тым ліку закрытага характару. Лідары Беларусі і Кітая фактычна далі старт паглыбленаму супрацоўніцтву дзвюх краін у сферах тэхналагічнай і прамысловай кааперацыі ў 2026-2027 гадах.

У Пекіне таксама адбылася сустрэча кіраўніка беларускай дзяржавы з Прэзідэнтам Расіі Уладзімірам Пуціным. Абодва лідары падкрэслілі асаблівую ўзаемную важнасць двухбаковых адносін: Беларусь і Расію адна для адной ніхто не заменіць.

версія для друку

зрабіць стартавай

дабавіць у выбранае