Галоўныя навіны

27 снежня, Мінск /Кар. БЕЛТА/. Прэзідэнт Беларусі Аляксандр Лукашэнка прыняў сёння ўдзел у навагоднім дабрачынным свяце для дзяцей у рамках акцыі "Нашы дзеці", перадае карэспандэнт БЕЛТА.

"Дарагія сябры, вы - галоўны здабытак нашай Беларусі. Гэта не проста прыгожыя словы, за гэтымі словамі - шчырая любоў, жаданне клапаціцца і абараняць, - падкрэсліў Аляксандр Лукашэнка. - Гэта натуральныя эмоцыі, якія выклікаюць нашы малышы і дзеткі старэйшыя".

Прэзідэнт прызнаўся, што прысутнічаць на дзіцячых навагодніх святах вялікі гонар і адказнасць. "Для мяне асабіста гэта хвалюючая місія: нішто ў жыцці не прыносіць такую радасць, як магчымасць падарыць дзецям казку, убачыць усмешку і радасць у вачах дзяцей. Для мяне як для Прэзідэнта гэта шчасце - у мільёнах дзяцей, якія жывуць у нашай краіне", - сказаў кіраўнік дзяржавы.

Ён звярнуў увагу, што для яго няма нічога важнейшага, чым мірнае і шчаслівае дзяцінства падрастаючага пакалення беларусаў. "Любы прэзідэнт, любы кіраўнік дзяржавы, кіраўнік любога ўзроўню ў той ці іншай краіне шчаслівы, калі дзеці жывуць у мірнай краіне", - адзначыў Прэзідэнт.

У мінулым годзе ўсё больш і больш журналісты ўсёй планеты паказвалі вочы насцярожаных, спалоханых дзяцей па прычыне выбухаў ад бомбаў і снарадаў. Гэта ўжо не дзяцінства. І гэта ўжо нават не маладосць гэтых дзяцей - гэта іх старэнне, выкліканае неразбярыхай, звязанай з дарослымі, - лічыць Аляксандр Лукашэнка. - Таму галоўнае - гэта мірнае і шчаслівае дзяцінства. І мы, дарослыя, павінны зрабіць усё, каб мірнае дзяцінства было ў вас, таму што тады і ў вашых дзяцей будзе такое ж шчаслівае дзяцінства".

Кіраўнік дзяржавы адзначыў, што ў дарослых ёсць вялікая колькасць падстаў ганарыцца падрастаючым пакаленнем беларусаў. "Гэта ваш паспяховы ўдзел у шматлікіх міжнародных конкурсах, спаборніцтвах, алімпіядах. Было прыемна даведацца, што маленькія жыхары нашай краіны актыўна ўключыліся ў мерапрыемствы, звязаныя з Годам малой радзімы, зрабілі шмат добрых спраў у сваіх гарадах, вёсках, маленькіх вёсачках, каб добраўпарадкаваць іх", - сказаў Прэзідэнт.

Аляксандр Лукашэнка заўважыў, што гэтыя справы застануцца назаўсёды ў памяці хлопчыкаў і дзяўчынак, і выказаў маленькім беларусам сваю ўдзячнасць. "На гэтай традыцыі пераемнасці, паважлівым стаўленні да людзей трымаецца ўся наша гісторыя дзяржавы", - заявіў кіраўнік дзяржавы.

Ён звярнуў увагу дзяцей, што ў іх наперадзе яшчэ вельмі шмат цікавага, іх чакае захапляючае жыццё, а побач заўсёды будуць блізкія людзі, гатовыя падставіць плячо, акружыць цеплынёй і ўвагай. "І вельмі хочацца, каб вы разумелі каштоўнасць усяго таго, што падарыў вам лёс, самога жыцця, незалежнай краіны, мірнага неба, добрых людзей, якія ў патрэбны момант сустрэліся і будуць пастаянна сустракацца на вашым доўгім шляху. Вельмі важна, каб вы ўжо ў гэтым узросце ставілі перад сабой пэўныя мэты, дабіваліся іх і ішлі да гэтых мэт, былі ўдзячнымі тым, хто дапамагае вам на шляху, - людзям, якія робяць наша жыццё лепшым", - дадаў Прэзідэнт.

Кіраўнік дзяржавы пажадаў дзецям вясёлых зімовых канікулаў і шчаслівага Новага года. "Вы пастарайцеся гэтыя канікулы выкарыстаць так, каб праз некалькі дзён, калі яны скончацца, вы адчулі, што сталі на паўпрыступкі вышэй, мудрэй, чамусьці навучыліся. Няхай гэты новы год падорыць вам шмат падстаў для добрага настрою, здзейсніць запаветныя мары і жаданні", - дадаў ён. Асобна Аляксандр Лукашэнка звярнуўся да бацькоў і блізкіх дзяцей, іх педагогаў, таксама павіншаваўшы іх з надыходзячым Новым годам.

Навагодняе дабрачыннае свята з удзелам кіраўніка дзяржавы стала галоўнай падзеяй акцыі "Нашы дзеці". На галоўную ёлку краіны запрасілі больш за 2,3 тыс. хлопчыкаў і дзяўчынак з усіх рэгіёнаў Беларусі. У іх лік увайшлі дзеці-сіроты і дзеці, якія засталіся без апекі бацькоў, выхоўваюцца ў апякунскіх і прыёмных сем'ях, а таксама выхаванцы кадэцкіх вучылішчаў, дзеці з сем'яў бежанцаў, пераможцы алімпіяд, творчых конкурсаў і фестываляў, спартыўных спаборніцтваў, юныя грамадскія актывісты. У Палацы Рэспублікі для іх падрыхтавалі маляўнічае казачнае музычна-сцэнічнае шоу ў выкананні лепшых творчых калектываў краіны, насычаную культурную праграму і падарункі ад імя Прэзідэнта.

Навагодняя дабрачынная акцыя "Нашы дзеці" праходзіць у Беларусі з 10 снежня 2018 года па 11 студзеня 2019 года. Кіраўнікі рэспубліканскіх органаў дзяржкіравання, мясцовых выканаўчых і распарадчых органаў у гэты час наведваюць дзіцячыя інтэрнаты і дамы сямейнага тыпу, бальніцы, апякунскія і прыёмныя сем'і, віншуюць дзяцей з Новым годам і Калядамі, уручаюць ім падарункі і аказваюць дапамогу ў вырашэнні існуючых праблем. Да дабрачыннай акцыі далучыліся грамадскія аб'яднанні і іншыя арганізацыі.