Галоўныя навіны

10 жніўня, Рыа-дэ-Жанэйра /Аляксандр Новікаў - БЕЛТА/. Алімпійская ўзнагарода яшчэ ў мяне не ў кішэні. Такое меркаванне карэспандэнту БЕЛТА выказаў беларускі тэнісіст Уладзімір Самсонаў, які ў 1/4 фіналу турніру па настольным тэнісе абыграў Дзмітрыя Аўчарова 4:2 (8:11, 11:7, 19:17, 4:11, 11:2, 14:12).

Апошні раз беларус перамагаў нямецкага тэнісіста ў фінале Qatar open у лютым 2015 года (4:1), таму перамога ў Рыа важная і з пункту гледжання асабістых сустрэч.

Пасля паражэння на старце 8:11 Уладзімір Самсонаў у другім сэце пры ліку 7:5 папрасіў медыцынскі перапынак, які быў выкліканы болямі ў правым баку. Вярнуўшыся да стала, беларус змог выйграць чатыры ачкі запар і зраўнаваць лік па сэтах. Напружанай выдалася канцоўка трэцяй партыі. Беларус лідзіраваў і пры ліку 10:9 папрасіў перапынак, які пайшоў на карысць нямецкаму тэнісісту. Дзмітрый Аўчароў выйшаў наперад 12:11, ад паражэння ў сэце Уладзіміра Самсонава выратавала ўдачная атака. Замацаваць свой поспех беларус змог толькі пасля дзвюх памылак прадстаўніка Германіі - 19:17.

"Думаю, на саперніка таксама вельмі моцна падзейнічала, што гульня часта перапынялася. Магу ўявіць стан Дзмітрыя Аўчарова, які з'яўляецца маім сябрам, і як яму было няпроста дзейнічаць, усведамляючы, што я гуляю з траўмай. Атрымаўся не зусім звычайны матч з-за праблем са здароўем, якія ўзніклі ў мяне па ходзе гульні", - адзначыў Уладзімір Самсонаў.

Лідар беларускага настольнага тэніса ўпершыню ў кар'еры згуляе ў паўфінале Алімпіяды, дзе яму будзе процістаяць Жыке Жанг з Кітая.

"Усё яшчэ не ўсвядоміў, што прабіўся ў паўфінал Алімпіяды. Гэта для мяне шостыя Гульні ў кар'еры. Раней найбольш рэальныя шанцы на медаль у мяне былі ў Атланце ў 1996-м. Я быў тады фаварытам, вёў па сэтах чвэрцьфінальнай сустрэчы з лікам 2:0, але прайграў. Тут у Рыа я ўжо ў чацвёрцы мацнейшых, але засталіся спартсмены, якіх абыграць будзе вельмі складана. Медаль усё яшчэ далёка, хоць узнагарода ўжо і бліжэй, чым перад матчам з Дзмітрыем Аўчаровым", - сказаў Уладзімір Самсонаў.

Пракаменціраваў атлет свой стан перад рашаючымі матчамі ў Рыа. "За апошнія шэсць гадоў часта ўзнікалі болі ў рэбрах. Гэта праблема зноў заявіла пра сябе і цяпер. Спадзяюся, нічога страшнага не адбылося, у мяне ёсць два дні, каб аднавіць сілы і гуляць у паўфінале", - падкрэсліў ён.

Раней лепшым дасягненнем Уладзіміра Самсонава на летніх Гульнях, у якіх ён прымае ўдзел з 1996 года, былі выхады ў чвэрцьфінал у Атланце (1996) і Сіднеі (2000).

За доўгія гады прафесійнай кар'еры Уладзімір Самсонаў, якому 40 гадоў, 24 разы выйграваў спаборніцтвы серыі Сусветнага тура, а таксама шматразова станавіўся пераможцам і прызёрам чэмпіянатаў свету і Еўропы ў адзіночным, парным і камандным разрадах. У яго паслужным спісе 5 запар Алімпійскіх гульняў (1996-2012), на працягу 15 гадоў Уладзімір Самсонаў уваходзіў у топ-10 сусветнага рэйтынгу (1996-2011). Згодна з апублікаваным міжнароднай федэрацыяй сусветным рэйтынгам, беларускі тэнісіст займае дзявятае месца.