Галоўныя навіны

17 верасня, Мінск /Кар. БЕЛТА/. Самых таленавітых дзяцей Беларусі запросяць на навагодняе свята ў Палац Незалежнасці, у якім плануецца ўдзел кіраўніка дзяржавы Аляксандра Лукашэнкі. Аб гэтым расказалі ў эфіры навін тэлеканала "Беларусь 1", паведамляе БЕЛТА.

Кульмінацыяй акцыі "Нашы дзеці" па традыцыі стане галоўная ёлка краіны, свята пройдзе 28 снежня ў Палацы Рэспублікі. "А днём раней адбудзецца яшчэ адна сустрэча, якая, безумоўна, запомніцца яе ўдзельнікам назаўсёды. Пераможцаў школьных алімпіяд, юных наватараў і вынаходнікаў, выдатнікаў і самых актыўных пад Новы год запрашае ў госці Прэзідэнт - у Палац Незалежнасці, - сказалі ў эфіры тэлеканала. - Месца, дзе праходзяць лёсавызначальныя палітычныя перагаворы і саміты, значныя эканамічныя нарады і сустрэчы з сусветнымі лідарамі, у пераднавагоднія дні напоўніцца святочнай атмасферай і ўтульнасцю. Яркая праграма, падарункі і нефармальная сустрэча з беларускім лідарам стануць сапраўдным сюрпрызам для 250 вундэркіндаў".

Як было адзначана, у шчыльным прэзідэнцкім графіку заўсёды ёсць месца для сустрэч з моладдзю і душэўных размоў, бо менавіта ад яе залежыць, якой наша краіна будзе праз дзесяцігоддзі. На святочным навагоднім мерапрыемстве 27 снежня ў Палацы Незалежнасці дзеці змогуць падзяліцца новымі ідэямі і расказаць аб ужо ажыццёўленых праектах.