Галоўныя навіны

Саміт ЕАЭС пройдзе сёння ў Мінску. Што на парадку дня пасяджэння

27 чэрвеня, Мінск /Кар. БЕЛТА/. Пасяджэнне Вышэйшага Еўразійскага эканамічнага савета адбудзецца 27 чэрвеня ў Мінску, паведамляе БЕЛТА.

Саміт пройдзе ў Палацы Незалежнасці пад старшынствам Прэзідэнта Беларусі Аляксандра Лукашэнкі. У пасяджэнні прымуць удзел лідары дзяржаў - членаў ЕАЭС, краін-наглядальнікаў і кіраўнікі замежных дэлегацый.

Гэта першае пасяджэнне Вышэйшага Еўразійскага эканамічнага савета ў 2025 годзе. Усяго на парадку дня саміту амаль паўтара дзясятка пытанняў. Яны датычацца міжнароднай дзейнасці, стратэгічных напрамкаў развіцця еўразійскай эканамічнай інтэграцыі, лібералізацыі паслуг у ЕАЭС, эканамічнага супрацоўніцтва ў галіне спорту, а таксама развіцця гандлёва-эканамічнага ўзаемадзеяння з асноўнымі партнёрамі ЕАЭС.

Чакаецца, што па выніках пасяджэння будзе падпісана дзесяць дакументаў. Краінам ЕАЭС, у прыватнасці, неабходна зацвердзіць асноўныя напрамкі супрацоўніцтва ў галіне спорту, заключыць дагавор аб эканамічным партнёрстве з ААЭ і часовае гандлёвае пагадненне з Манголіяй.

Напярэдадні ў беларускай сталіцы прайшоў IV Еўразійскі эканамічны форум. У пленарнай сесіі "Стратэгія еўразійскай эканамічнай інтэграцыі: вынікі і перспектывы" прынялі ўдзел кіраўнік дзяржавы Аляксандр Лукашэнка і высокія госці з краін-партнёраў.

У час выступлення Прэзідэнт Беларусі абазначыў контуры абноўленай версіі эканамічнага саюза, акцэнтаваўшы ўвагу на неабходнасці стварэння фірменнага еўразійскага прадукту.

"Работа па кааперацыйных праектах пачата, прыняты адпаведныя рашэнні, у саюзным бюджэце на гэтыя мэты прадугледжаны немалыя грошы. Трэба не даганяць адзін аднаго ў традыцыйных галінах, а разам стаць лідарамі ў новых, такіх, аб якіх мы пакуль, можа, нават і не думаем. Але яны самі прыйдуць. Аб'яднаўшы патэнцыялы нашых эканомік, мы можам стварыць унікальны еўразійскі прадукт. Ад самалётаў і паяздоў да лічбавых рашэнняў і штучнага інтэлекту. Сёе-тое ў гэтых галінах мы ўжо навучыліся рабіць", - заявіў Аляксандр Лукашэнка.

версія для друку

зрабіць стартавай

дабавіць у выбранае