Галоўныя навіны

"Нашых рынкаў тут, а ў перспектыве сусветных рынкаў па прадуктах харчавання, адзенні, па іншых напрамках, тэхніцы нават, на ўсіх хопіць. Попыт будзе толькі расці. Таму вы на нас можаце разлічваць", - заявіў кіраўнік дзяржавы.

"Вы павінны ведаць, што вы прыехалі як да сябе дамоў. Мы вас з вялікім задавальненнем тут сустракаем і гатовы аказаць усялякае садзейнічанне. Не толькі таму, што зацікаўлены ў супрацоўніцтве з вамі, а проста таму, што мы родныя людзі. І жыць нам разам доўгія часы, - сказаў Прэзідэнт. - Таму я заўсёды вітаю губернатараў, якія ў свой час выратавалі наш саюз Беларусі і Расіі. Заўсёды з імі сустракаюся. Ведайце, што калі мы нешта зможам зрабіць для вас, для расіян, мы з вялікім задавальненнем гэта зробім".

Аляксандр Лукашэнка падкрэсліў, што Пензенская вобласць для Беларусі - шчыры, сумленны сябар і надзейны партнёр. Нягледзячы на падзенне тавараабароту на працягу апошніх некалькіх гадоў, у 2016 годзе яго ўдалося павялічыць на 8 працэнтаў. Адпаведны паказчык перасягнуў $50 млн. Дадатная дынаміка захоўваецца. У студзені-красавіку бягучага года тавараабарот павялічыўся больш як у 1,5 раза ў параўнанні з аналагічным перыядам мінулага года.

"Гэта нядрэнныя тэмпы. З улікам патэнцыялу Беларусі і вашага рэгіёна лакаматывам развіцця нашага супрацоўніцтва бачыцца перш за ўсё ўзмацненне ўзаемадзеяння ў прамысловай сферы", - заявіў Прэзідэнт.

Ён адзначыў, што на тэрыторыі Пензенскай вобласці паспяхова працуюць дылерскія цэнтры многіх прадпрыемстваў рэспублікі - "Амкадора", "Гомсельмаша", "Аршанскага інструментальнага завода" і іншых. Рэалізуюцца праекты прамысловай кааперацыі. На завод ГрАЗ у Пензенскай вобласці пастаўляюцца шасі Мінскага аўтазавода для камунальнай тэхнікі, на прадпрыемства "Пензадызельмаш" - беларускія камплектуючыя для дызель-генератараў.

У той жа час з-за нізкай эканамічнай эфектыўнасці прыпынена сумесная вытворчасць прадукцыі "Магілёўліфтмаша". У сувязі з гэтым Аляксандр Лукашэнка прапанаваў спецыялістам з абодвух бакоў прааналізаваць сітуацыю. "Улічваючы тое, што Расія сур'ёзна займаецца мадэрнізацыяй жыллёвага комплексу, без ліфтаў не абысціся. Мы гэта бачым і па іншых рэгіёнах", - сказаў кіраўнік дзяржавы.

Прэзідэнт адзначыў, што практычны інтарэс у партнёраў з Пензенскай вобласці выклікаюць праекты, рэалізуемыя Беларуссю ў сельскагаспадарчай сферы. З асноўнымі дасягненнямі ў гэтай галіне дэлегацыя зможа азнаёміцца на выстаўцы "Белагра-2017". "Мы будзем рады падзяліцца існуючым вопытам, тэхналогіямі ў жывёлагадоўлі, вырошчванні розных сельскагаспадарчых культур, стварэнні буйных малочнатаварных і зернесушыльных комплексаў, агароднінасховішчаў, іншых аб'ектаў. Гатовы пастаўляць у вашу вобласць шырокі спектр сельгастэхнікі", - заявіў Аляксандр Лукашэнка.

У якасці аднаго з перспектыўных напрамкаў беларускі лідар назваў супрацоўніцтва ў будаўнічым сектары і жыллёва-камунальнай гаспадарцы. "Нашы кампаніі маюць станоўчы вопыт узвядзення жылля, будаўніцтва дарог, у тым ліку ў Расіі. Калі вам будзе неабходна, мы гатовы забяспечыць рэгіён гэтымі работамі і неабходнай для гэтага тэхнікай", - сказаў Прэзідэнт.

Пензенская вобласць таксама зацікаўлена ў арганізацыі вытворчасці бульбянога крухмалу. Кіраўнік дзяржавы і ў гэтай сферы прапанаваў выкарыстоўваць адпаведны беларускі вопыт і тэхналогіі.

Аляксандр Лукашэнка таксама звярнуў увагу на магчымасць супрацоўніцтва ў сферы паставак пасажырскага транспарту, у тым ліку аўтобусаў, тралейбусаў, электробусаў.

"І вам ёсць што прапанаваць Беларусі. Добра вядомы вашы дасягненні ў навукаёмістых галінах прамысловасці, развіцці аграрнага комплексу з апорай на буйныя фермерскія гаспадаркі. Словам, у нас ёсць усе магчымасці для яшчэ больш выгаднага супрацоўніцтва рэгіёнаў Беларусі з Пензенскай вобласцю", - упэўнены кіраўнік дзяржавы.

"Калі мы будзем у вас нешта будаваць, ствараць вытворчасці і іншае, вы павінны быць упэўнены, што мы гэта зробім не горш, чым вашы ўласныя кампаніі ў Расіі, а тое, што танней, - гэта 100 працэнтаў, - запэўніў Аляксандр Лукашэнка. - Калі толькі асобныя людзі ў нас у расійскім урадзе не пачнуць блакіраваць, каб мы не ішлі на рынак... Раптам цэны ўпадуць. Баімся там нейкім алігархам скараціць прыбытак. Калі гэтага не будзе, то мы заўсёды будзем з вамі працаваць і не мець ніякіх праблем".