Галоўныя навіны

12 красавіка, Мінск /Кар. БЕЛТА/. Ураджэнец Беларусі касманаўт Алег Навіцкі з борта Міжнароднай касмічнай станцыі павіншаваў зямлян з Днём касманаўтыкі, паведамляе БЕЛТА.

"Касмічныя даследаванні - гэта сапраўдны лакаматыў развіцця зямной цывілізацыі. Кожны год удасканальваюцца ракеты-носьбіты і касмічныя апараты. Мы праводзім усё больш складаныя навуковыя і медыка-біялагічныя даследаванні, - сказаў касманаўт. - Развіваецца МКС, з'яўляюцца новыя модулі. Чалавецтва рухаецца наперад, і я ўпэўнены - недалёка той дзень, калі мы пачнём ствараць базы на Месяцы і на Марсе".

Алег Навіцкі адзначыў, што сёння свята ўсіх, хто любіць космас і марыць аб пакарэнні Сусвету. "Проста ўзнімі галаву - і зоркі стануць бліжэйшымі!" - звярнуўся касманаўт з борта МКС.

Па ініцыятыве Генеральнай асамблеі ААН 12 красавіка абвешчана Міжнародным днём палёту чалавека ў космас. Менавіта ў гэты дзень у 1961 годзе Юрый Гагарын здзейсніў першы ў гісторыі чалавецтва касмічны палёт.