Галоўныя навіны
На нараду ў Лукашэнкі вынесена пытанне ўдасканалення дзейнасці КДБ
7 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка 7 жніўня сабраў нараду па пытаннях дзейнасці Камітэта дзяржаўнай бяспекі (КДБ) Беларусі. Сярод галоўных тэм - магчымае ўдасканаленне работы гэтай структуры, перадае карэспандэнт БЕЛТА.
У пачатку кіраўнік дзяржавы адзначыў, што правядзенне мерапрыемства звязана не толькі з той сітуацыяй, якая складваецца ўнутры краіны. "Але больш за ўсё - з ваенна-палітычнай абстаноўкай вакол Беларусі. Насцярожвае, што вельмі жудасна, агрэсіўна ў адносінах да Беларусі настроены нашы суседзі - Польшча і краіны Балтыі, - сказаў Прэзідэнт. - Націск ажыццяўляецца па ўсіх напрамках. Больш за ўсё гэты націск адчуваюць нашы спецыяльныя службы. Таму мы (у краіне. - Заўвага БЕЛТА), я перш за ўсё, удзяляем самую пільную ўвагу рабоце КДБ і наогул сілавога блока".
Што датычыцца асноўнай тэматыкі нарады, то, як вядома, некаторы час таму старшыня КДБ прапанаваў удасканаленне дзейнасці КДБ. Таксама з улікам напрацаваных за апошні час вопыту і практыкі. "2020 год - гэта ўрокі, урокі і яшчэ раз урокі. Гэта закранула ўсе напрамкі дзейнасці нашай дзяржавы, у тым ліку і Камітэта дзяржбяспекі, - заўважыў Аляксандр Лукашэнка. - Недахопы свае мы ўбачылі ў 2020 годзе і пасля, вузкія месцы таксама мы выявілі. Трэба іх ліквідаваць. Гэта перш за ўсё трэба зрабіць".
Паводле слоў Прэзідэнта, КДБ, як і іншыя дзяржструктуры, часам "мае нейкую ведамаснасць". Таму, нягледзячы на давер з боку кіраўніка дзяржавы і да Івана Тэртэля, і ў цэлым Камітэта дзяржбяспекі, было прынята рашэнне прапанаваныя старшынёй КДБ ініцыятывы рэвізаваць. Прадметна іх вывучыць, прааналізаваць і далажыць Прэзідэнту было даручана дзяржсакратару і сакратарыяту Савета бяспекі.
"Такія прапановы і заключэнні былі ўнесены (з боку Савета бяспекі. - Заўвага БЕЛТА). Тым не менш, паколькі гэта спецыфічная служба, спецслужба, у вузкім асяроддзі з людзьмі, якія некалі працавалі ў КДБ, я вырашыў паглядзець на гэтыя прапановы, - растлумачыў кіраўнік дзяржавы. - Спадзяюся, што мы аб'ектыўна абмяркуем гэту тэму і прыйдзем да адпаведнага заключэння".
З асноўным дакладам па заяўленай тэматыцы выступіў дзяржаўны сакратар Савета бяспекі Аляксандр Вальфовіч. Сярод удзельнікаў мерапрыемства - старшыня КДБ Іван Тэртэль, генеральны пракурор Андрэй Швед, старшыня Палаты прадстаўнікоў Нацыянальнага сходу Ігар Сергяенка, кіраўнік Апарату Савета Міністраў Валерый Вакульчык.
Аляксандр Лукашэнка ўдакладніў, што пры ўдасканаленні дзейнасці КДБ не плануецца скарачаць грашовае забеспячэнне або заработныя платы супрацоўнікаў гэтай структуры. "Тут якраз грошай шкадаваць не трэба для тых, хто працуе ў КДБ. Грошай чэкістам шкадаваць не трэба за канкрэтныя вынікі. Мы са старшынёй тут наладзілі гэту сістэму. Я заўсёды пасля пэўных аперацый яго папярэджваю, што хлопцы, якія зарабілі гэтыя грошы, павінны іх атрымаць, нават звыш таго", - заявіў кіраўнік дзяржавы.
Але ў той жа час Прэзідэнт звярнуў увагу на захаванне разумнай колькасці КДБ і рацыянальнае выкарыстанне фінансавых рэсурсаў.
"Мы дамовіліся аб тым, што ні ў якім разе не будзем павышаць колькасць па ўсіх напрамках. Вы бачыце, што адбываецца. У нас значны адток ад грамадзянскіх спецыяльнасцей у ваенныя і гэтак далей. Таму людзі патрэбны на вытворчасці перш за ўсё. Адтуль забіраць людзей па вялікім рахунку мы не маем ніякага права. Гэта датычыцца ўсіх, у тым ліку Камітэта дзяржбяспекі. Гэта калі гаварыць пра колькасць", - звярнуўся да ўдзельнікаў нарады Аляксандр Лукашэнка.
Беларускі лідар закрануў тэму матэрыяльных затрат, якія павінны быць рацыянальнымі і не выкарыстоўвацца на неперспектыўныя напрамкі. "Трэба будаваць жыллё, трэба павялічваць грашовае забеспячэнне ваеннаслужачым у цэлым. З гэтага трэба зыходзіць, а не нарошчваць траты на нейкія неперспектыўныя справы", - дадаў ён.
Аляксандр Лукашэнка таксама заклікаў узмацніць работу па лініі кібербяспекі. Кіраўнік дзяржавы ўпэўнены, што ў краіне ёсць адпаведныя спецыялісты, якія могуць на самым высокім узроўні забяспечыць абарону кіберпрасторы. "Людзі ў нас разумныя, талковыя ў краіне. Іх трэба знайсці і гарантаваць бяспеку ў кіберпрасторы з улікам меркавання гэтых разумных і талковых людзей, патрыётаў. Іх нямала ў краіне", - падкрэсліў Прэзідэнт.
версія для друку
зрабіць стартавай
дабавіць у выбранае