Галоўныя навіны
"Мы павінны рабіць сваё". Лукашэнка патрабуе асвойваць уласную вытворчасць новых машын для АПК
8 жніўня, Смалявіцкі раён /Кар. БЕЛТА/. Прэзідэнт Беларусі Аляксандр Лукашэнка пры наведванні "Азярыцкі-Агра" ў Смалявіцкім раёне ставіць задачу асвойваць айчынную вытворчасць розных відаў тэхнікі для сельскай гаспадаркі, перадае карэспандэнт БЕЛТА.
Адзначалася, што ўраджайнасць рапсу розніцца па рэгіёнах і ў гаспадарках. Напрыклад, у "Азярыцкім-Агра" яна дасягае 52 ц/га, і гэта, можна сказаць, узорны прыклад. "Люба-дорага паглядзець на поле, апрацавана ўсё, прыгожа! Азярцо зрабілі, акультурылі, - даў высокую ацэнку кіраўнік дзяржавы. - Калі б у нас палі апрацоўвалі ўсюды, і рапс і нашы гібрыды, нашы сарты мелі б ураджайнасць няхай не 50 цэнтнераў (з гектара. - Заўвага БЕЛТА), але 45 дакладна".
Дасягнуць добрых вынікаў удаецца за кошт многіх кампанентаў: выкарыстоўваюцца гібрыдныя сарты (як імпартныя, так і айчынныя, хоць апошнія яшчэ не заўсёды дацягваюць па якасці), выконваецца тэхналогія вырошчвання і ўборкі, своечасова і ў дастатковай колькасці ўносяцца ўгнаенні, прымяняецца добрая тэхніка для ўборкі.
На гэту тэму - тэхнікі для ўборкі - размова зайшла падрабязная і прадметная. Прэзідэнт спытаў, якая цяпер лакалізацыя пры вытворчасці прэс-падборшчыкаў на айчынных прадпрыемствах. Было даложана, што яна складае каля 35-40 працэнтаў, але асноўныя вузлы ўсё ж замежнай вытворчасці.
Аляксандр Лукашэнка нагадаў, што ставіў адпаведныя задачы пры назначэнні Віктара Каранкевіча віцэ-прэм'ерам, які адказвае за прамысловы сектар, - размова ішла пра неабходнасць вырабляць уласны, беларускі аўтаматычны прэс і робат для даення кароў, якія па характарыстыках павінны быць не горшыя за імпартныя.
"Мы павінны сваё рабіць", - падкрэсліў кіраўнік дзяржавы. Ён заўважыў, што такая сітуацыя шмат гадоў таму складвалася на машынабудаўнічых прадпрыемствах краіны, лакалізацыя была нізкай, усё завозілася па імпарце, пакуль Прэзідэнт не паставіў строгую задачу - праводзіць імпартазамяшчэнне і рабіць сваё, у выніку цяпер у Беларусі ёсць свой аўтамабіль. "Дакладна гэтак жа і тут. Пяць-дзесяць гадоў таму вы камплектуючыя завозілі, сёння - лакалізацыя, замена замежнага беларускім. Рабіце!" - сказаў Аляксандр Лукашэнка.
Выкарыстанне прэс-падборшчыкаў дае магчымасць аптымізаваць працэс уборкі і нарыхтоўкі кармоў. У Беларусі з-за ўмоў надвор'я вельмі цяжка нарыхтаваць і захаваць якаснае сена для далейшага кармлення жывёл, колькасць вільгаці бывае празмернай, што ўплывае на якасць канечнага прадукту. Ад гэтага спосабу нарыхтоўкі кормаў не трэба адмаўляцца цалкам, але добрай альтэрнатывай з'яўляецца кансервацыя кармоў у рулоны плёнкі. "Вось для чаго нам патрэбны прэс, мы без яго не абыдземся. Камбайн мы сякі-такі атрымалі (уборачны. - Заўвага БЕЛТА), нібыта ён не ўступае замежнаму", - заўважыў Прэзідэнт, удакладніўшы, што аналагічным чынам трэба папрацаваць над айчынным прэс-падборшчыкам.
Тое ж самае датычыцца неабходнасці распрацаваць і вырабіць свой уласны робат для даення кароў. Трэба абавязкова ісці па шляху большай механізацыі ў сельскай гаспадарцы і іншых сферах, гэта дасць магчымасць не толькі павышаць эфектыўнасць, але і працаваць якасна пры скарачэнні працоўных рэсурсаў.
У размове аб імпартазамяшчэнні закранаўся яшчэ адзін важны аспект - вытворчасць плёнкі, якая выкарыстоўваецца пры нарыхтоўцы кармоў прэс-падборшчыкамі і далейшай кансервацыі. Гэты матэрыял займае вялікую ўдзельную вагу ў агульным кошце (да 60 працэнтаў), рабіць нарыхтоўку кармоў такім спосабам значна даражэй, чым прывычнай тэхналогіяй закладкі кармоў у траншэі. Аднак пры кансервацыі ў плёнку захаванасць кармоў, іх якасць істотна вышэйшая, а значыць, і прадукцыйнасць кароў, захаванасць жывёлы, якая спажывае гэты корм, таксама лепшая. "Таму калі ўзяць у цэлым, то гэта (кансервацыя ў плёнку. - Заўвага БЕЛТА) - справа добрая", - лічыць Аляксандр Лукашэнка.
Напрыклад, у Мінскай вобласці выкарыстоўваецца плёнка пяці вытворцаў, з якіх два беларускія і тры кітайскія. Па характарыстыках і кошце яны прыкладна супастаўныя. Але Прэзідэнт паставіў задачу знізіць кошт айчыннай плёнкі, каб яе доля ў сабекошце работ па кансервацыі кармоў скарацілася з цяперашніх 60 працэнтаў да прыкладна 30-35 працэнтаў. "Але гэта (такую нарыхтоўку кармоў) трэба рабіць, таму што захаваем цялят, захаваем карову і атрымаем вынік", - сказаў Прэзідэнт.
версія для друку
зрабіць стартавай
дабавіць у выбранае