Галоўныя навіны

15 чэрвеня, Мінск /Кар. БЕЛТА/. Мінская дэкларацыя адобрана дэлегатамі для ўнясення на зацвярджэнне высокага ўзроўню Нарады бакоў Канвенцыі Эспа, што адбудзецца 16 чэрвеня, паведамілі карэспандэнту БЕЛТА ў прэс-службе Міністэрства прыродных рэсурсаў і аховы навакольнага асяроддзя.

"Прыняцце і рэалізацыя палажэнняў Мінскай дэкларацыі будзе садзейнічаць дасягненню мэт у галіне ўстойлівага развіцця да 2030 года", - адзначылі ў прэс-службе. Таксама прыняцце дэкларацыі пасадзейнічае ўзмацненню ролі Канвенцыі Эспа і Пратакола па стратэгічнай экалагічнай ацэнцы ў вырашэнні ключавых праблем, такіх як змяненне клімату і страта біялагічнай разнастайнасці, прымяненню Канвенцыі і Пратакола ў рэгіёне ЕЭК з асаблівым акцэнтам на краіны Усходняй Еўропы, Каўказа і Цэнтральнай Азіі, глабальнаму прымяненню Канвенцыі і Пратакола і абмену вопытам з іншымі рэгіёнамі свету.

Сёмая сесія Нарады бакоў Канвенцыі Эспа праходзіць 13-16 чэрвеня ў Мінску. У мерапрыемствах прымаюць удзел каля 200 прадстаўнікоў з 45 дзяржаў - членаў Канвенцыі Эспа, у тым ліку міністры, намеснікі міністраў прыродаахоўных і іншых ведамстваў, а таксама высокапастаўленыя службовыя асобы міжнародных арганізацый і фінансавых інстытутаў, грамадскасці.

Канвенцыя Эспа была прынята 25 лютага 1991 года ў горадзе Эспа (Фінляндыя) і ўступіла ў сілу 10 верасня 1997 года. Яна ратыфікавана 45 дзяржавамі. Канвенцыя аб ацэнцы ўздзеяння на навакольнае асяроддзе ў трансгранічным кантэксце замацоўвае абавязацельствы бакоў адносна ацэнкі ўздзеяння на навакольнае асяроддзе на ранніх стадыях планавання. Яна таксама змяшчае агульныя абавязацельствы дзяржаў інфармаваць і кансультавацца адна з адной пры разглядзе ўсіх буйных праектаў, якія маглі б мець значнае ўздзеянне на навакольнае асяроддзе, што выходзіць за рамкі нацыянальных граніц.