Галоўныя навіны

Мінскі міжнародны Калядны оперны форум - яркія прэм'еры, новыя імёны і лепшыя спектаклі з рэпертуару тэатра.

Праграма ўключае творы сусветнай опернай класікі, прэм'еры сезона і дорыць знаёмства з новымі зоркамі на оперным небасхіле. Ужо сем гадоў гэты форум аб'ядноўвае сапраўдных аматараў класічнага мастацтва.

Адкрываецца форум сёння. На сцэне Вялікага тэатра - легендарная драма іспанскіх страсцей опера "Кармэн" Жоржа Бізэ. У партыі Хазэ - Франчэска Піа Галаса (Італія). Вучань Мантсэрат Кабалье, узыходзячая оперная зорка Франчэска Піа Галаса вядомы і запатрабаваны ў оперным свеце. Знатакі опернага мастацтва прадказваюць яму тытул караля опернай сцэны, які некалі прысвоілі Лучана Павароці. Малады італьянскі тэнар пакарае публіку прыгожым тэмбрам і рэдкай свабодай выканання. За дырыжорскім пультам - маэстра Даніэль Мантанэ (Іспанія), які знаёмы беларускай публіцы.

Стваральнікі спектакля "Макбет" 15 снежня запрашаюць гледачоў акунуцца ў змрочную атмасферу палацавых змоў і інтрыг пад хвалюючую музыку маэстра Вердзі. Партыю Банка - паплечніка і бліжэйшага таварыша крывавага караля Макбета выканае саліст Маладзёжнай опернай праграмы Вялікага тэатра Расіі Гадэрдзі Джанелідзэ (Грузія). Выпускнік вакальнага факультэта Тбіліскай дзяржаўнай кансерваторыі імя Вано Сараджышвілі, ужо ў час вучобы выконваў вядучыя партыі ў операх "Чароўная флейта" В.А.Моцарта, "Рыгалета" Дж. Вердзі, "Севільскі цырульнік" Дж. Расіні і інш. Удзельнічаў у майстар-класах Рэната Брузона і Брыгіты Фасбендэр. З 2015 года Гадэрдзі Джанелідзэ ўдзельнічае ў Маладзёжнай опернай праграме Вялікага тэатра Расіі.

Вялікі тэатр Беларусі 17 снежня прымае ў сябе оперную трупу Адэскага Нацыянальнага Акадэмічнага тэатра оперы і балеты, якая прадставіць беларускім гледачам містычны трылер Пятра Чайкоўскага "Пікавая дама" ў пастаноўцы народнага артыста Рэспублікі Малдова Аляксандру Самоілэ (дырыжор-пастаноўшчык), народнага артыста Расіі Аляксандра Ціцеля (рэжысёр-пастаноўшчык), заслужанага дзеяча мастацтваў Расіі Станіслава Марозава (мастак-пастаноўшчык). Прэм'ера "Пікавай дамы" на сцэне Адэскага опернага тэатра адбылася ў 2013 годзе і застаецца самай папулярнай пастаноўкай у рэпертуары тэатра.

Прэм'еру бягучага тэатральнага сезона - оперу Вольфганга Амадэя Моцарта "Вяселле Фігара" 18 снежня на суд гледачоў прадставіць Вялікі тэатр Беларусі. Вядучыя мужчынскія партыі выканаюць: Фігара - Герман Юкаўскі (Расія), Граф Альмавіва - Сяргей Маскалькоў (Расія). Саліст Камернага музычнага тэатра імя Б.А.Пакроўскага Герман Юкаўскі - выпускнік Дзяржаўнага музычнага вучылішча імя Гнесіных і Дзяржаўнага інстытута тэатральнага мастацтва імя А.В. Луначарскага. Служыць у Камерным музычным тэатры, вядзе актыўную сольную канцэртную дзейнасць у Расіі і за мяжой, у 2010 годзе намініраваны на нацыянальную тэатральную прэмію "Залатая маска" за ролю Хлудава ў оперы "Бег". Мастацкі дырэктар і саліст тэатра "Руская опера" Сяргей Маскалькоў знаёмы беларускай публіцы па выкананні партыі Тоніа ў прэм'ерным паказе спектакля "Паяцы" Руджэра Леанкавала на сцэне Вялікага тэатра Беларусі (2014 год).

А 19 снежня на сцэне беларускага Вялікага тэатра - бязлітасная і прыгожая прынцэса Джакома Пучыні. Тры смяротныя загадкі змрочнай Турандот трэба будзе адгадаць прынцу Калафу, у выкананні заслужанага артыста Расіі Ахмеда Агадзі. Ахмед Агадзі неаднаразова з вялікім поспехам выступаў на сцэне Вялікага тэатра Беларусі: у снежні 2013 года ён выканаў партыю Калафа ў спектаклі "Турандот" Мінскага міжнароднага Каляднага опернага форуму, у 2014-м выканаў партыю Радамеса ў оперы "Аіда", а таксама Каварадосі ў оперы "Тоска" і ўвайшоў у лік фаварытаў беларускай публікі.

Мінскі міжнародны Калядны оперны форум-2016 завершыцца грандыёзным гала-канцэртам, які падорыць паклоннікам опернага мастацтва сустрэчу з зоркамі сусветнай оперы, сярод якіх: Хелен Лепалаан (Эстонія), Арэвік Гюльбудагян (Арменія), Талгат Мусабаеў (Казахстан), Фідан Гаджыева (Азербайджан), Антон Зараеў (Расія), Раман Палісадаў (Латвія), Даніэль Дамянаў (Балгарыя), Жан-Філіп Фарцье-Лазюр (Канада), Кірыл Барчанінаў (Узбекістан), Францішак Заграднічак (Чэхія), Франчэска Сарцені (Францыя-Італія), Ганна Любаньска (Польшча), Ахмед Агадзі (Расія), Дайнюс Стумбрас (Літва), Юлія Лысенка (Украіна), Марцін Баб'як (Славакія). Вялікія оперныя арыі і дуэты, музычныя шлягеры і знаёмыя кожнаму мелодыі, выкананыя ў суправаджэнні віртуозных музыкантаў сімфанічнага аркестра Вялікага тэатра Беларусі, створаць непаўторную атмасферу Каляднага свята оперы. За дырыжорскім пультам - Андрэй Галанаў.