Галоўныя навіны

Лукашэнка заявіў аб правільнасці гістарычнага выбару на карысць развіцця супрацоўніцтва з Кітаем

8 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка заявіў аб правільнасці гістарычнага выбару на карысць развіцця супрацоўніцтва з Кітаем. Адпаведная заява была зроблена на сустрэчы з намеснікам старшыні Кітайскай Народнай Рэспублікі Хань Чжэнам, перадае карэспандэнт БЕЛТА.

"Добра, што Вы прыехалі ў гэты час да нас. У вас ёсць магчымасць бліжэй на практыцы пазнаёміцца з нашай краінай. Што датычыцца нашых адносін, яны складваліся на працягу апошніх дзесяцігоддзяў. У Беларусі пра Кітай вельмі шмат гавораць. За гэтымі размовамі, палітычнымі нашымі адносінамі настаў вельмі бурны рост гандлёва-эканамічных адносін. І мы вельмі задаволены, што ў свой час Гасподзь дапамог нам сарыентавацца менавіта на Кітайскую Народную Рэспубліку", - сказаў Аляксандр Лукашэнка.

Ён падкрэсліў, што вынікам дасягнення паміж краінамі ўзроўню ўсепагоднага і ўсебаковага стратэгічнага партнёрства стала ўсёабдымнае супрацоўніцтва ва ўсіх сферах.

"Выбачайце за нясціпласць, але смею сказаць аб тым, што Кітайская Народная Рэспубліка, кіраўніцтва рэспублікі, нават калі і хацела б нам прад'явіць якія-небудзь прэтэнзіі, не змагло б. Таму што мы свята выконваем усе нашы дамоўленасці, - сказаў Аляксандр Лукашэнка. - Любыя перагаворы, з кім бы ні вялі - з расіянамі, еўрапейцамі або амерыканцамі, - КНР заўсёды выводзіцца за дужкі. Нашы адносіны не падлягаюць нават абмеркаванню".

"Вы на нас можаце разлічваць як на самых надзейных сяброў і прыхільнікаў", - запэўніў беларускі лідар.

версія для друку

зрабіць стартавай

дабавіць у выбранае