Галоўныя навіны
Лукашэнка сустрэўся з выканаўчым дырэктарам кампаніі Emaar Properties Мухамедам аль-Абарам
28 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка сёння сустрэўся з выканаўчым дырэктарам кампаніі Emaar Properties Мухамедам аль-Абарам, перадае карэспандэнт БЕЛТА.
"Улічваючы тое, што вы прыехалі на гэты раз з сынам, значыць, вы ўжо добра замацаваліся ў нашай сталіцы, - адзначыў Аляксандр Лукашэнка. - Мы вас прымаем тут з вялікім задавальненнем не таму, што вы вельмі багаты чалавек. А таму, што вы ў няпросты, складаны час падтрымлівалі Беларусь, кіраўніцтва Эміратаў заўсёды падтрымлівала Беларусь. І за тое, што вы супрацоўнічаеце з Беларуссю і, галоўнае, інвесціруеце ў Беларусь. Словам, мы вас успрымаем як блізкага сябра нашай краіны, дружба з якім праверана часам".
Прэзідэнт канстатаваў, што, нягледзячы на складаны 2020 год, Беларусь і ААЭ значна прыбавілі ў тавараабароце. За мінулы год ён склаў $110 млн.
"Сёння я хацеў бы пачуць, ці не змянілася ваша жаданне працаваць у Беларусі, - сказаў кіраўнік дзяржавы. - Я таксама хацеў бы пачуць ваша меркаванне наконт многіх праектаў, якія мы абмяркоўвалі з наследным прынцам, калі ён быў тут. І вы самі прапаноўвалі шэраг праектаў, у якіх вы вельмі зацікаўлены ў Беларусі".
Пасля сустрэчы з кіраўніком дзяржавы Мухамед аль-Абар адзначыў, што беларуская эканоміка працуе стабільна нават ва ўмовах пандэміі і гэта добры знак для інвестара. "Я буду прадаўжаць працаваць у Беларусі і інвесціраваць", - заявіў арабскі бізнесмен у час размовы з журналістамі.
Арабскі бізнес рэалізуе ў Мінску маштабны праект разумнага горада на 4 млрд еўра, які атрымаў назву "Паўночны бераг". Ён размесціцца ў межах МКАД - пр.Пераможцаў - вул.Арлоўскай - Цнянскага вадасховішча. У складзе комплексу будуць пабудаваны жылыя дамы з усёй неабходнай інжынернай і транспартнай інфраструктурай, сацыяльныя аб'екты і аб'екты грамадскага прызначэння агульнай плошчай больш як 6 млн кв.м.
У першую чаргу плануецца ўзвесці будынкі Нацыянальнага выставачнага цэнтра, Інстытута штучнага інтэлекту, Мінскага цэнтра міжнароднага гандлю. У кастрычніку мінулага года на месцы будаўніцтва Нацыянальнага выставачнага цэнтра прэм'ер-міністр Беларусі Раман Галоўчанка і Мухамед аль-Абар заклалі памятную капсулу.
Мухамед аль-Абар лічыцца адным з найбольш буйных і паспяховы бізнесменаў ААЭ. Ён з'яўляецца саветнікам па эканамічных і інвестыцыйных пытаннях (асабістых і дзяржаўных) кіраўнікоў Абу-Дабі і Дубая. Гэта арабскі бізнесмен - фактычна ідэйны натхняльнік і выканаўца канцэпцыі стварэння сучаснага Дубая. Мухамед аль-Абар - саўладальнік буйных міжнародных кампаній у галіне электроннага гандлю, грамадскага харчавання, моды і дызайну. Яго чысты капітал ацэньваецца ў памеры $4,6 млрд.
Кампанія Emaar Properties - адзін з буйнейшых у свеце дэвелапераў і інвестараў у галіне будаўніцтва. Валодае больш як 60 даччынымі кампаніямі і прысутнічае на рынках больш як 35 краін на Блізкім Усходзе, у Паўночнай Афрыцы, Азіі, Еўропе і Паўночнай Амерыцы. Спецыялізуецца на гасцінічным бізнесе, гандлёва-забаўляльнай інфраструктуры, здачы ў арэнду камерцыйнай нерухомай маёмасці, развіцці інфармацыйна-камунікацыйных тэхналогій і паслуг для розных сфер бізнесу, інвесціраванні і абслугоўванні нерухомай маёмасці.
Буйнейшыя будаўнічыя праекты Дубая, уключаючы самы высокі ў свеце будынак Бурдж-Халіфа і адзін з буйнейшых гандлёвых цэнтраў "Дубай Мол", былі рэалізаваны менавіта Emaar Properties. Акрамя таго, кампанія забудоўвае Эканамічны горад караля Абдалы ў Саудаўскай Аравіі. Плошча праекта займае 168 кв.км і ўключае ў сябе марскі порт, прамысловую зону, дзелавы, курортны і жылы раёны, адукацыйныя і медыцынскія ўстановы, гандлёвыя аб'екты.
версія для друку
зрабіць стартавай
дабавіць у выбранае