Галоўныя навіны

Лукашэнка прыняў удзел у V Еўразійскім эканамічным форуме ў Астане

28 мая, Астана /Кар. БЕЛТА/. Прэзідэнт Беларусі Аляксандр Лукашэнка прыняў удзел у V Еўразійскім эканамічным форуме ў Астане, перадае карэспандэнт БЕЛТА.

Месцам правядзення форуму стаў кангрэс-цэнтр на тэрыторыі дзелавога комплексу EXPO. Кангрэс-цэнтр з'яўляецца шматфункцыянальным дзелавым культурна-забаўляльным аб'ектам, які мае шырокія магчымасці для правядзення міжнародных форумаў, канферэнцый, афіцыйных мерапрыемстваў.

Галоўная тэма Еўразійскага эканамічнага форуму - "ЕАЭС у глабальнай лічбавай гонцы: стаўка на штучны інтэлект". Як расказалі ў прэс-службе беларускага лідара, Аляксандр Лукашэнка прадставіў пазіцыю беларускага боку па пытаннях тэхналагічнай кааперацыі ў рамках ЕАЭС і ўкаранення штучнага інтэлекту ў рэальны сектар эканомікі, прывёў прыклады айчыннага вопыту ў гэтай сферы.

На наступны дзень, 29 мая, Аляксандр Лукашэнка прыме ўдзел у пасяджэнні Вышэйшага Еўразійскага эканамічнага савета, парадак дня якога ўключае каля двух дзясяткаў пытанняў. Саміт пройдзе ў вузкім і пашыраным складзе. Кіраўнікі дзяржаў абмяркуюць развіццё міжнароднага гандлю і супрацоўніцтва з партнёрамі ЕАЭС, выкарыстанне штучнага інтэлекту, пытанні мытнага заканадаўства, рэалізацыі кааперацыйных праектаў і шэраг іншых.

Лукашэнка ў Астане наведаў выстаўку лічбавых дасягненняў краін ЕАЭС

28 мая, Астана /Кар. БЕЛТА/. Прэзідэнт Беларусі Аляксандр Лукашэнка і іншыя кіраўнікі замежных дэлегацый у Астане наведалі выстаўку лічбавых дасягненняў Еўразійскага эканамічнага саюза, перадае карэспандэнт БЕЛТА.

Выстаўка арганізавана ў міжнародным цэнтры штучнага інтэлекту "Alem.ai".

На беларускім стэндзе прадстаўлены сімбіёз штучнага інтэлекту і прамысловых тэхналогій у рэальным сектары эканомікі.

Адзін з прыкладаў такога сімбіёзу - разумнае земляробства. Першы беспілотнік для сельскай гаспадаркі быў распрацаваны ў 2021 годзе, а цяпер выкарыстанне аградронаў у Беларусі - паўсядзённая практыка. Гэта дазваляе выключыць механічнае ўздзеянне на глебу, мінімізаваць кантакт чалавека з хімічнымі рэчывамі. Для гэтага створана цэлая сістэма: лічбавыя карты палёў, базы даных аб клімаце і стане глебы і іншае.

Яшчэ адна перадавая распрацоўка - беспілотныя БЕЛАЗы. Больш за дзесяць гадоў таму быў прадстаўлены самазвал, здольны перамяшчацца без вадзіцеля. Тэхніка самастойна руліла, разганялася і тармазіла. З той пары лінейка пастаянна пашыраецца. Дарэчы, код з'яўляецца на 100 працэнтаў айчынным - ён створаны рэзідэнтамі Парка высокіх тэхналогій.

На беларускім стэндзе дэманстравалі і робататэхнічныя комплексы на вытворчасці. У Беларусі плануюць давесці паказчык укаранення прамысловых робатаў да больш як 150 адзінак на 10 тыс. работнікаў. Гэта мэта практычна дасягнута на шэрагу беларускіх вытворчасцей.