Галоўныя навіны

Лукашэнка прымае ўдзел у саміце кіраўнікоў дзяржаў СНД

18 снежня, Мінск /Кар. БЕЛТА/. Прэзідэнт Беларусі Аляксандр Лукашэнка прымае ўдзел у пасяджэнні Савета кіраўнікоў дзяржаў Садружнасці Незалежных Дзяржаў, якое праходзіць у фармаце відэаканферэнцыі, перадае карэспандэнт БЕЛТА.

У пачатку свайго выступлення Аляксандр Лукашэнка падзякаваў Прэзідэнту Узбекістана Шаўкату Мірзіёеву за актыўную і плённую дзейнасць Узбекістана ў якасці краіны, якая старшынствуе ў СНД у гэтым годзе. "Аддаю належнае прафесіяналізму нашых узбекскіх сяброў, якія вымушаны выконваць сваю місію ў такой пажаранебяспечнай абстаноўцы. Аб адным з пажараў, які ўспыхнуў на постсавецкай прасторы ў зоне адказнасці СНД, толькі што гаварыў наш сябар Прэзідэнт Азербайджана. Не забывайце аб падзеях у Беларусі, Кыргызстане, ва Украіне сёння хапае праблем. Адным словам, пажар ды і толькі", - сказаў кіраўнік беларускай дзяржавы.

На саміце лідары Беларусі, Азербайджана, Казахстана, Кыргызстана, Малдовы, Расіі, Таджыкістана і Узбекістана плануюць абмяняцца меркаваннямі аб узаемадзеянні ў рамках СНД (на гэты раз на саміце не прысутнічае прадстаўнік Арменіі).

Як растлумачыў старшыня Выканкама СНД Сяргей Лебедзеў, напярэдадні Выканкам СНД атрымаў ноту з МЗС Арменіі, у якой паведамлялася, што з-за непрадбачаных акалічнасцей прэм'ер-міністр Арменіі Нікол Пашынян не зможа прыняць удзел у саміце. Сяргей Лебедзеў растлумачыў, што прадстаўнікі Арменіі прымалі ўдзел у дэталёвай прапрацоўцы дакументаў, якія прапануюцца для разгляду на саміце, таму пасля ўзгаднення кіраўнікамі дзяржаў дакументы будуць накіраваны ў Ерэван для падпісання армянскім бокам.

Прадугледжваецца, што кіраўнікі дзяржаў абмяркуюць і зацвердзяць новую рэдакцыю Канцэпцыі далейшага развіцця СНД і план па яе рэалізацыі. Адным з важных пытанняў парадку дня саміту стане развіццё і ўмацаванне міжпарламенцкага супрацоўніцтва краін Садружнасці.

Па выніках саміту павінна быць прынята рашэнне аб тым, што ў 2021 годзе старшынства ў СНД пяройдзе да Беларусі, сустаршынямі будуць Узбекістан, які старшынствуе ў гэтым годзе, і Казахстан.

версія для друку

зрабіць стартавай

дабавіць у выбранае