Галоўныя навіны

Лукашэнка пацікавіўся альтэрнатыўнымі схемамі паставак беларускай прадукцыі

16 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка сёння ў час рабочай сустрэчы з міністрам транспарту і камунікацый Аляксеем Аўраменкам і віцэ-прэм'ерам Анатолем Сіваком, які курыруе сферу, запатрабаваў далажыць аб прапрацоўцы альтэрнатыўных схем паставак беларускай прадукцыі за мяжу, перадае карэспандэнт БЕЛТА.

"Пра што я хацеў бы пачуць - альтэрнатыўныя схемы паставак нашай прадукцыі", - абазначыў адно з пытанняў сустрэчы кіраўнік дзяржавы.

Як паведамлялася БЕЛТА, 20 ліпеня на нарадзе па прыярытэтах знешняй палітыкі на сучасным этапе Аляксандр Лукашэнка гаварыў аб тым, што задачай нумар адзін для беларускіх дыпламатычных прадстаўніцтваў за мяжой застаецца знешні гандаль. "Мы невялікая адкрытая краіна з экспартна арыентаванай эканомікай. Без экспарту мы не выжывем. Няхай вас не палохаюць заходнія так званыя сектаральныя санкцыі. На нашы тавары заўсёды ёсць попыт. Трэба толькі прыкласці крыху больш намаганняў. Прададзім сваю прадукцыю - вырашым пытанне з санкцыямі. Мы сваёй работай павінны зрабіць іх неэфектыўнымі, непрыкметнымі для грамадзян, - падкрэсліў Аляксандр Лукашэнка. - Мы павінны і на гэтым полі, як на вуліцы ў жніўні-верасні, паставіць усіх на месца, хто скоса глядзіць на нашу краіну і бярэцца за эканамічную зброю".

Да гэтай тэмы кіраўнік дзяржавы вяртаўся і ў час "Вялікай размовы з Прэзідэнтам" - сустрэчы з прадстаўнікамі грамадскасці, медыясферы і журналістамі 9 жніўня. Аляксандр Лукашэнка ў прыватнасці адказаў на пагрозы Літвы спыніць транзіт калійных угнаенняў. "Пачалі круціць-вярцець. Стрэлілі сабе ў нагу. А цяпер хочуць закрыць нам парты для таго, каб грузіць хімічныя калійныя ўгнаенні", - сказаў Прэзідэнт.

Аляксандр Лукашэнка заявіў, што ў такім выпадку Беларусь перанакіруе патокі ў іншыя парты - на тэрыторыі Расіі. "Слухайце, мы паставім гэтыя аб'ёмы. У Мурманску загрузім. Гэта не праблема. І па паўночным марскім шляху карацейшай дарогай паставім у Кітай. Гэта наш асноўны рынак. І ў Індыю - паўднёвы ўсход, - адзначыў беларускі лідар. - Пакуль мы не загналі адзін аднаго ў вугал, выходзіць з гэтай сітуацыі трэба цяпер. Але мяч на тым баку".

версія для друку

зрабіць стартавай

дабавіць у выбранае