Галоўныя навіны

Лукашэнка патрабуе эфектыўнага расходавання сродкаў і аптымальнага падыходу ў рабоце медустаноў

8 лістапада, Мінск /Кар. БЕЛТА/. Прэзідэнт Беларусі Аляксандр Лукашэнка патрабуе эфектыўнага расходавання сродкаў і аптымальнага падыходу ў рабоце медустаноў. Аб гэтым ён заявіў 6 лістапада, наведваючы ў Оршы гарадскую бальніцу нумар 1 імя Сямашкі, перадае карэспандэнт БЕЛТА.

Аляксандр Лукашэнка ў дэталях цікавіўся арганізацыяй медыцынскай дапамогі ва ўстановах аховы здароўя, у тым ліку работай прыёмных аддзяленняў, колькасцю і эфектыўнасцю выкарыстання аперацыйных, лячэннем пацыентаў на тэрыторыі Аршанскага раёна ў цэлым.

Разам з неабходнасцю забяспечыць даступнасць усяго спектра медпаслуг для насельніцтва ўсё павінна быць па-гаспадарску і аптымальна, звярнуў увагу Прэзідэнт. "Трэба, каб было ўсё аптымальна. Гэта вялікія грошы", - сказаў ён.

Аляксандр Лукашэнка падкрэсліў, што бальніцы, умоўна кажучы, не павінны ператварацца ў санаторыі і дамы адпачынку і ва ўмовах стацыянара пацыенты павінны знаходзіцца аптымальную колькасць часу.

"Трэба грошы траціць на зарплату ўрачоў, іх прафесійны рост і тэхніку. Аперацыйныя павінны быць ідэальныя", - сказаў беларускі лідар.

Ён адзначыў, што ў краіне ўжо шмат пабудавана сучасных лячэбных устаноў: "Не трэба палацы будаваць. Мы іх пабудавалі ўжо. Таму трэба ўсё аптымальна выкарыстоўваць. Па-гаспадарску трэба. Трэба лічыць грошы, нават у ахове здароўя".

"Кавід для нас - вопыт. Мы ўсе сур'ёзна разварушыліся, убачылі слабыя месцы і ўсялякія празмернасці, якія ў нас ёсць. Гэта для нас важна, - падкрэсліў Прэзідэнт. - Для мяне важна гэта аптымізацыя. Трэба сканцэнтраваць грошы, каб дапамагчы ўрачам".

Галоўны ўрач Аршанскай цэнтральнай паліклінікі Сяргей Карака далажыў Прэзідэнту аб структуры ўстаноў аховы здароўя ў раёне, выніках работы першай бальніцы і аб арганізацыі планавай і экстраннай медыцынскай дапамогі, у тым ліку пацыентам з COVID-19.

У бальніцы Аляксандр Лукашэнка наведаў аддзяленні рэанімацыі і анестэзіялогіі, траўматалогіі і ангіяграфіі. Прэзідэнту расказалі аб лячэнні пацыентаў, аснашчэнні сучасным медабсталяваннем. Кіраўнік дзяржавы таксама азнаёміўся з лячэннем пацыентаў з каранавіруснай інфекцыяй. Ён пабываў у "чырвонай зоне" аддзялення рэанімацыі і пульманалогіі.

Сяргей Карака расказаў кіраўніку дзяржавы аб эпідсітуацыі і ходзе вакцынацыі. Апошнім часам у раёне адзначаецца спад захваральнасці на COVID-19, у лячэбных установах вызваляюцца ложкі, а колькасць шпіталізаваных стала ніжэйшай, чым выпісаных. Урач запэўніў: вакцынацыя дае відавочны эфект з пункту гледжання фарміравання калектыўнага імунітэту. А прышчэпленыя пацыенты калі і захворваюць, то пераносяць COVID-19 у больш лёгкай форме. "Мы ўчора спакойна выпісалі 72 чалавекі, 26 паступіла. Пасля вакцынацыі тут былі практычна адзінкі людзей, я ўжо не кажу пра рэанімацыю", - сказаў ён.

У склад Аршанскай цэнтральнай паліклінікі ўваходзяць амбулаторна-паліклінічныя арганізацыі (4 паліклінікі для дарослых і 2 для дзяцей, 2 спецыялізаваныя дыспансеры, 13 амбулаторый урача агульнай практыкі (з іх 4 у складзе ўчастковых бальніц), 23 фельчарска-акушэрскія пункты, 7 бальнічных арганізацый: гарадская бальніца нумар 1 імя Сямашкі, гарадская бальніца нумар 3, гарадскі радзільны дом і 4 сельскія ўчастковыя бальніцы.

Агульная магутнасць стацыянараў установы аховы здароўя - 1145 ложкаў, у тым ліку 40 ложкаў дзённага знаходжання, 55 ложкаў сястрынскага догляду і 1050 кругласутачных (у тым ліку ў гарадской бальніцы нумар 1 - 719 ложкаў), а таксама 10 ложкаў медыцынскай рэабілітацыі, якія ўтрымліваюцца за кошт пазабюджэтных сродкаў.

версія для друку

зрабіць стартавай

дабавіць у выбранае