Галоўныя навіны

Лукашэнка наведае з візітам Кітай, дзе пройдуць саміт ШАС і ваенны парад

Фота з архiва

29 жніўня, Мінск /Кар. БЕЛТА/. Прэзідэнт Рэспублікі Беларусь Аляксандр Лукашэнка накіруецца з рабочым візітам у Кітайскую Народную Рэспубліку. Аб гэтым БЕЛТА паведамілі ў прэс-службе беларускага лідара.

Кіраўнік беларускай дзяржавы 31 жніўня - 1 верасня ў горадзе Цяньцзінь прыме ўдзел у саміце Шанхайскай арганізацыі супрацоўніцтва, які стане буйнейшым за ўсю гісторыю аб'яднання.

Аляксандр Лукашэнка ў сваім выступленні на пасяджэнні Савета кіраўнікоў дзяржаў ШАС агучыць прапановы беларускага боку па далейшым развіцці шматпланавага супрацоўніцтва ўнутры "шанхайскай сям'і", акрэсліць ключавыя пытанні, якія патрабуюць узмоцненай увагі.

Як чакаецца, сярод найбольш важных дакументаў кіраўнікі дзяржаў прымуць Цяньцзіньскую дэкларацыю і зацвердзяць стратэгію развіцця ШАС на наступныя 10 гадоў - да 2035 года. Акрамя таго, плануецца разгледзець шэраг іншых пытанняў у сферы бяспекі, эканамічнага і гуманітарнага супрацоўніцтва, прыняць адпаведныя рашэнні, сумесныя заявы і падпісаць міждзяржаўныя пагадненні.

Прэзідэнт Беларусі таксама прыме ўдзел у саміце ў фармаце "ШАС плюс". Да ўдзельнікаў пасяджэння далучацца кіраўнікі дзяржаў-наглядальнікаў, міжнародных арганізацый, высокія госці, запрошаныя кітайскім бокам, які старшынствуе. Усяго - больш за тры дзясяткі кіраўнікоў дзяржаў і кіраўнікоў міжнародных арганізацый.

Па запрашэнні кіраўніцтва КНР 3 верасня ў Пекіне Аляксандр Лукашэнка прыме ўдзел у святочных мерапрыемствах, прысвечаных 80-годдзю Перамогі над японскім мілітарызмам і заканчэнню Другой сусветнай вайны. Аляксандр Лукашэнка будзе прысутнічаць на парадзе, які пройдзе на плошчы Цяньаньмэнь.

Дні знаходжання Прэзідэнта Беларусі ў Кітаі таксама будуць напоўнены перагаворамі з калегамі - кіраўнікамі дзяржаў. Асобную ўвагу плануецца ўдзяліць пытанням развіцця беларуска-кітайскага супрацоўніцтва.

версія для друку

зрабіць стартавай

дабавіць у выбранае