Галоўныя навіны

Лукашэнка нагадаў аб страшнай цане, заплачанай за вызваленне Еўропы ад фашызму

9 мая, Мінск /Кар. БЕЛТА/. Кіраўнік дзяржавы Аляксандр Лукашэнка на свята 9 Мая ў Мінску на цырымоніі ўскладання вянкоў і кветак да манумента Перамогі нагадаў аб тым, якую страшную цану заплацілі народы Савецкага Саюза і непасрэдна Беларусі за вызваленне Еўропы ад фашызму, перадае карэспандэнт БЕЛТА.

"Мы святкуем дзень Вялікай Перамогі, які падарыў нашаму народу жыццё і свабоду. Святкуем з году ў год, з шэсцямі, салютамі. Са слязамі і горыччу. З таго самага моманту, калі над савецкай краінай прагучаў голас Левітана. Тады дыктар сказаў слова, якое марыў пачуць кожны: "Перамога!". Яно змяніла свет. Вялікая Айчынная вайна завяршылася. Наша некалі вялікая савецкая Радзіма, закатаваная, змучаная, вызваліла Еўропу. Усе, уключаючы заходніх лідараў, прызналі вызначальную, галоўную ролю Савецкага Саюза ў разгроме фашызму. Гэта было тады. Усе, у тым ліку і жыхары заходніх краін, ведалі, які след пакінулі на нашай зямлі гітлераўскія карнікі", - сказаў кіраўнік дзяржавы.

Аляксандр Лукашэнка нагадаў, што ў Савецкім Саюзе ў гады вайны загінулі больш за 30 млн чалавек, мільёны засталіся сіротамі, 25 млн чалавек былі пазбаўлены роднага дома. Былі разбураны 2 тыс. гарадоў, знішчаны больш за 70 тыс. вёсак.

"І мільёны жыццяў, зламаных па волі вар'ята і яго арміі, сабранай з усёй Еўропы, - заўважыў Прэзідэнт. - Крымінальная справа аб генацыдзе беларускага народа дабаўляе да лічбаў нашых страт новыя. Плюс 47 карных аперацый, пра якія мы не ведалі. Плюс 166 месцаў знішчэння і пахавання. На карце спаленых вёсак ужо 13 тысяч адрасоў, 300 населеных пунктаў падзялілі трагічны лёс Хатыні".

Беларусь у той вайне страціла кожнага трэцяга свайго жыхара. "Незаменная для нас страта і страшная цана за тое, каб патухлі печы Асвенціма і Трэблінкі. Каб больш ніколі з усходу на захад не ішлі эшалоны з рабскай рабочай сілай, багаццем роднай зямлі. Тады, у 1945-м, кожны савецкі воін, які прайшоў праз вызваленую Беларусь, ведаў, што ён пойдзе далей, да самага Берліна. Па дарозе свяшчэннай барацьбы дабра са злом", - падкрэсліў беларускі лідар.

версія для друку

зрабіць стартавай

дабавіць у выбранае