Галоўныя навіны

25 кастрычніка, Мінск /Аліна Грышкевіч - БЕЛТА/. Лічбавізацыя забяспечыць больш эфектыўную работу рэальнага сектара эканомікі. Аб гэтым Прэзідэнт Беларусі Аляксандр Лукашэнка заявіў сёння ў час даклада першага намесніка прэм'ер-міністра Аляксандра Турчына, перадае карэспандэнт БЕЛТА.

У ходзе даклада абмяркоўвалася пытанне па развіцці ІТ-сферы і лічбавізацыі эканомікі і краіны ў цэлым. "Розныя былі прапановы, яны зыходзілі ў асноўным непасрэдна ад айцішнікаў - стварыць ледзь не асобны ўрад па лічбавізацыі краіны, потым стварыць міністэрства лічбавай эканомікі, - адзначыў Прэзідэнт. - Мы ўжо шмат працуем над развіццём ІТ-сферы, у тым ліку з часу стварэння Парка высокіх тэхналогій вопыт напрацоўвалі".

Як падкрэсліў Аляксандр Лукашэнка, сёння гэтага вопыту дастаткова, каб рабіць чарговыя крокі ў развіцці не толькі ПВТ, але лічбавізацыі ўсёй краіны. "Гэта, вядома, модна, але справа не ў модзе. На мой жаль, можа, і на ваш, справа ў тым, што будучае нашай краіны - не толькі ў рэальным сектары эканомікі і яго развіцці. А можа, і на шчасце, таму што для рэальнага сектара эканомікі, вы ведаеце, амаль усю сыравіну мы набываем. А вось ІТ-сфера і яе развіццё, даходы ад яе - гэта мазгі, гэта чалавечы капітал, і ў гэтым плане мы можам вельмі шмат мець для развіцця краіны і для дабрабыту нашага народа. Ад рэальнага сектара мы нікуды не адыдзем - лічбавізацыя забяспечыць больш эфектыўную яго работу".

Па выніках даклада было даручана правесці ў I квартале 2019 года нараду з удзелам Прэзідэнта Беларусі па развіцці лічбавай эканомікі ў краіне. Мерапрыемства, як чакаецца, будзе маштабным, але не па колькасці ўдзельнікаў, а па важнасці мэт і задач, якія стаяць перад краінай у сувязі з маючай адбыцца лічбавізацыяй эканомікі.