Галоўныя навіны

2 лістапада, Віцебск /Міхаіл Маціеўскі - БЕЛТА/. Частку крэдытных сродкаў, якія выдзелены беларускаму боку Кітаем, трэба накіроўваць на падтрымку прыватнага бізнесу. Такую задачу Прэзідэнт Беларусі Аляксандр Лукашэнка паставіў кіраўніцтву ўрада ў час наведвання Віцебскага футравага камбіната, перадае карэспандэнт БЕЛТА.

"У нас вялікая колькасць нявыбраных камерцыйных кітайскіх крэдытаў, сем мільярдаў, ёсць яшчэ і танныя. Нядаўна я распарадзіўся, каб вы перасталі арыентавацца толькі на гігантаў, - сказаў Аляксандр Лукашэнка. - Ёсць талковы прыватнік, якога мы ведаем, не проста шарлатаны з вуліцы, вось ім трэба дапамагаць. Яны за 20-30 мільёнаў (долараў. - Заўвага БЕЛТА) створаць нам сотні тысяч рабочых месцаў".

Пры гэтым, падкрэсліў ён, не абавязкова выдзяляць на будаўніцтва новых прыватных прадпрыемстваў сотні мільёнаў або мільярды долараў.

Кіраўнік дзяржавы прывёў у прыклад Віцебскі футравы камбінат. Пасля таго, як прадпрыемства было выкуплена кампаніяй "Марко" ў 2013 годзе, у яго рэканструкцыю і мадэрнізацыю інвесціравалі амаль $24 млн. На камбінаце ўжо створана больш за 300 рабочых месцаў, плануецца павялічыць іх да 500.

"Цудоўнае прадпрыемства, - пахваліў Прэзідэнт. - Калі б ён (гендырэктар "Марко" Мікалай Мартынаў. - Заўвага БЕЛТА) сябе не зарэкамендаваў, я б з ім не размаўляў ні пра холдынг, ні пра гэта. Ён сябе зарэкамендаваў добрым прыватнікам, бізнесменам".