Галоўныя навіны

Лукашэнка: для большасці беларусаў Дзень Незалежнасці азначае мір

3 ліпеня, Мінск /Кар. БЕЛТА/. Дзень Незалежнасці для большасці жыхароў Беларусі азначае мір. Аб гэтым Прэзідэнт Беларусі Аляксандр Лукашэнка заявіў на цырымоніі ў мемарыяльным комплексе "Курган Славы", перадае карэспандэнт БЕЛТА.

"Сёння мы - мільёны беларусаў - адзначаем галоўнае дзяржаўнае свята нашай любімай Радзімы. Сустракаем яго летняй раніцай у святым месцы, сярод выспяваючых палёў Міншчыны, без страху гледзячы ў роднае сіняе неба. Перакананы, што для большасці беларусаў свята азначае мір", - падкрэсліў кіраўнік дзяржавы.

Аляксандр Лукашэнка адзначыў, што вызваленне сталіцы Беларусі 3 ліпеня 1944 года ў ходзе аперацыі "Баграціён" вярнула гэты мір на зраненую беларускую зямлю і стала важным этапам на шляху да Вялікай Перамогі. "Вось сапраўды: па тых мемарыялах і помніках, якія беларускі народ узвёў у даніну павагі пераможцам, можна вывучаць як мінімум гісторыю Вялікай Айчыннай вайны", - сказаў Прэзідэнт.

Ён нагадаў, што менавіта там, дзе цяпер размешчаны мемарыяльны комплекс "Курган Славы", на подступах да сэрца Радзімы, самкнулася кола "Мінскага катла" вакол групоўкі фашыстаў, пасля разгрому якой за лічаныя тыдні была вызвалена ўся Беларусь.

"Сёння па волі народа гэту знакавую дату Вялікай Айчыннай вайны мы святкуем у Дзень Незалежнасці. І аддаём даніну памяці тым, хто загінуў смерцю храбрых за наша мірнае сучаснае. Мы ўспамінаем ахвяр вайны і ўшаноўваем нашых дарагіх ветэранаў вайны і працы, чые стойкасць, мужнасць і любоў да Радзімы будуць заўсёды прыкладам для нас і будучых пакаленняў. Нізкі паклон і вечная слава ўсім, хто загінуў за свабоду і незалежнасць роднай Беларусі", - сказаў Аляксандр Лукашэнка.

Удзельнікі мерапрыемства ўшанавалі памяць загінулых мінутай маўчання.

"У мірнай паспяховай краіне, нашай Беларусі, нам цяжка сёння ўявіць, што адчувалі людзі тады ў разбураных ворагам гарадах і вёсках, кожны дзень сутыкаючыся твар у твар са смерцю. Але яны не сталі на калені. Яны змагаліся, выжылі і перамаглі. Вораг, які прыйшоў на нашу зямлю, тады спаўна адчуў сілу народнага гневу рэспублікі-партызанкі. Зямля гарэла пад нагамі акупантаў", - падкрэсліў Прэзідэнт.

Аляксандр Лукашэнка звярнуў увагу, што знішчэнне фашыстамі савецкага народа ў гады вайны пачалося менавіта на тэрыторыі Беларусі: "Калі мы разважаем на тэму, дык хто ж пацярпеў больш у гэтай вайне (хоць такой праблемы быць не павінна, але тым не менш), мы павінны памятаць: знішчэнне савецкага народа ў гады Вялікай Айчыннай вайны (трэць або чвэрць фашысты планавалі пакінуць на гэтай тэрыторыі) пачалося тут, з Беларусі. Менавіта тут пачалося знішчэнне тых, хто жыў у Савецкім Саюзе. І мы сёння адкрыта называем гэта генацыдам беларускага народа".

Кіраўнік дзяржавы нагадаў, што тады на барацьбу ўзнялася ўся краіна: "І стары і малы: чырвонаармейцы, партызаны, падпольшчыкі. Многія пайшлі на фронт добраахвотнікамі або цэлымі сем'ямі ў лясы, не скарыўшыся ворагу. Дзеля нашай свабоды ўсе яны ступілі ў бессмяротнасць, ахвяраваўшы сваімі жыццямі".

У гонар гэтых людзей і на славу найвялікшага подзвігу па славянскім звычаі і быў насыпаны курган - сімвал мужнасці народа, яго барацьбы за свабоду і нецмянеючай памяці ўдзячных нашчадкаў.

версія для друку

зрабіць стартавай

дабавіць у выбранае