Галоўныя навіны
Лукашэнка даручыў да 2021 года пабудаваць у Беларусі Нацыянальны выставачны цэнтр
14 мая, Мінск /Уладзімір Мацвееў - БЕЛТА/. Прэзідэнт Беларусі Аляксандр Лукашэнка даручыў да 2021 года пабудаваць у краіне Нацыянальны выставачны цэнтр. Аб гэтым ён заявіў сёння, заслухоўваючы даклад па пытанні будаўніцтва такога цэнтра, перадае карэспандэнт БЕЛТА.
Прэзідэнт падкрэсліў, што арганізацыя выставачнай дзейнасці з'яўляецца вельмі сур'ёзным і прынцыповым пытаннем для Беларусі, і краіне патрэбны Нацыянальны выставачны цэнтр. "Такі выставачны цэнтр у любой краіне патрэбны. У сучасным свеце немагчыма без арганізацыі выставак і падобных мерапрыемстваў весці перш за ўсё гандаль. Ну а для экспартна арыентаванай краіны наогул немагчыма развіццё. Мы даўно гаварылі на гэту тэму, мною была пастаўлена задача аб прапрацоўцы пытанняў развіцця выставачнай дзейнасці і будаўніцтва нацыянальнага цэнтра, які адпавядаў бы ўсім патрабаванням сучаснасці. Але пытанне неапраўдана зацягнулася. Давайце вызначацца і зробім так, каб ужо ў 2021 годзе мы мелі такі цэнтр", - сказаў кіраўнік дзяржавы.
Аляксандр Лукашэнка таксама адзначыў, што выставачная дзейнасць павінна праводзіцца актыўна і абавязкова быць эфектыўнай. У сувязі з гэтым ён даручыў падумаць над пытаннем аб стварэнні адзінай сістэмы і адзінага цэнтра выставачнай дзейнасці. "Прымаюцца ўсе прапановы. Рашэнне трэба прымаць у гэтым паўгоддзі па другім пытанні, ды і па першым трэба вызначацца і пачынаць будаўніцтва гэтага цэнтра", - падкрэсліў беларускі лідар.
Адносна Нацыянальнага выставачнага цэнтра Прэзідэнт агучыў прынцыповае патрабаванне: гэты аб'ект павінен быць функцыянальным, але яго трэба пабудаваць без лішніх трат. "Цэнтр не павінен быць палацавым. Гэта павінен быць функцыянальны цэнтр з усімі будынкамі і памяшканнямі для правядзення такіх мерапрыемстваў. Каб гэты цэнтр быў танным, не трэба нічога мудраваць. Ён, вядома, павінен быць знешне прыгожым, але гэта не значыць, што мы павінны плаціць шалёныя грошы. Таму трэба зрабіць проста і прыгожа, якасна, - сказаў беларускі лідар. - Лішніх трат быць не павінна. Падрыхтуйце праектную прапанову і ўнясіце мне для азнаямлення".
Першы віцэ-прэм'ер Аляксандр Турчын у пачатку даклада адзначыў, што пытанне аб будаўніцтве Нацыянальнага выставачнага цэнтра абмяркоўваецца ўжо больш за 10 гадоў. Былі розныя прапановы, разглядаліся тыя ці іншыя пляцоўкі і крыніцы фінансавання.
У краіне штогод праводзіцца больш за 100 выставак, якія ахопліваюць практычна ўсе галіны эканомікі: прамысловасць, сельскую гаспадарку, будаўніцтва, інфармацыйныя тэхналогіі, турызм і іншыя. Многія з іх арганізуюцца на пастаяннай аснове, маюць міжнародны статус і карыстаюцца вялікай папулярнасцю ў дзелавых колах. Найбольш значнымі і маштабнымі з'яўляюцца выстаўкі "Белагра", Budexpo, "Прадэкспа", "ТІБО", MILEX. У 2018 годзе ў рэспубліцы, галоўным чынам у Мінску, праведзена 209 выставак і кірмашоў, з іх 42 з выставачнай плошчай звыш 1 тыс. кв.м.
На рынку выставачных паслуг краіны дзейнічаюць 8 аператараў, якія маюць вопыт у арганізацыі міжнародных выставак: РУП "Нацыянальны выставачны цэнтр "Белэкспа", ЗАТ "Мінскэкспа", ЗАТ "Тэхніка і камунікацыі", УП "Экспафорум" і ТАА "Экспасістэмс", УП "Белінтэрэкспа", ТАА "Макбел", ТАА "Экспаліст". Інфраструктура выставачнай дзейнасці прадстаўлена спецыялізаванымі збудаваннямі (павільён "Белэкспа" па прасп. Пераможцаў, 14 у Мінску і выставачны комплекс Кітайска-Беларускага індустрыяльнага парка "Вялікі камень") і неспецыялізаванымі пляцоўкамі з экспазіцыйнай плошчай: спартыўныя комплексы (Футбольны манеж, Палац спорту, "Мінск-Арэна", "Чыжоўка-Арэна"), палацы культуры, буйныя гандлёвыя цэнтры, канферэнц-залы гасцініц.
версія для друку
зрабіць стартавай
дабавіць у выбранае