Галоўныя навіны

Лукашэнка: Беларусь павінна выкарыстоўваць кожны свабодны метр расійскіх партоў для адгрузкі тавараў

11 жніўня, Мінск /Кар. БЕЛТА/. Беларусь павінна выкарыстоўваць кожны свабодны метр расійскіх партоў для адгрузкі тавараў. Аб гэтым Прэзідэнт Беларусі Аляксандр Лукашэнка заявіў на нарадзе па стварэнні партовых магутнасцей для экспарту беларускай прадукцыі, перадае карэспандэнт БЕЛТА.

"У нас няма часу чакаць, пакуль пабудуецца тая ці іншая інфраструктура ў якім-небудзь порце. Размова ідзе сёння перш за ўсё аб паўночна-заходнім рэгіёне Расійскай Федэрацыі. Прэзідэнт Расіі асабіста паказаў мне ўсе парты Піцера і вакол яго (ён ведае гэта дасканала) і прапанаваў: выбірайце любы напрамак. Але я яму сказаў, нам ужо сёння трэба грузіць. Кажа: любую кропку - і пачынайце грузіць. Таму, я так вобразна часта гавару, пакуль будзем будаваць, мяшкамі будзем грузіць. Зразумела, 12 мільёнаў тон і больш мяшкамі не загрузіш, але тым не менш гэта сведчыць аб тым, што мы ўжо сёння павінны літаральна на кожным свабодным квадратным метры расійскіх партоў грузіць свае тавары", - падкрэсліў Аляксандр Лукашэнка.

Кіраўнік дзяржавы адзначыў, што беларускія кампаніі ўжо вядуць гэту работу. "Але трэба паскарацца. Таму давайце абмяркуем пытанне перспектыўнае і бягучае, як будзем працаваць. З боку дзяржавы павінна быць поўная падтрымка. Такую ж падтрымку я атрымаў і ад Прэзідэнта Расіі. Скажыце, што трэба для таго, каб больш аператыўна будаваць і сёння ў існуючых партах (вы ведаеце, дзе ёсць свабодныя магутнасці) грузіць нашы грузы", - дадаў Прэзідэнт.

версія для друку

зрабіць стартавай

дабавіць у выбранае