Галоўныя навіны
Лукашэнка: Беларусь будзе ісці сваім шляхам, чаго б ёй гэта ні каштавала
2 ліпеня, Мінск /Кар. БЕЛТА/. Беларусь будзе ісці сваім шляхам, чаго б ёй гэта ні каштавала. Аб гэтым Прэзідэнт Беларусі Аляксандр Лукашэнка заявіў сёння на ўрачыстым сходзе, прысвечаным Дню Незалежнасці, перадае карэспандэнт БЕЛТА.
Прэзідэнт нагадаў пра савецкую эпоху, якая, заўважыў ён, дала беларусам магчымасць упершыню ў сваёй гісторыі пабудаваць легітымную дзяржаву - рэспубліку з усімі нацыянальнымі атрыбутамі: беларускімі сцягам, гербам і гімнам. "Але ў навейшы час наша пакаленне мае гонар рэалізаваць абсалютнае права на дзяржаўны суверэнітэт і незалежнасць. На шчасце, без крыві і ўзрушэнняў. І мы зрабілі гэта, выбраўшы шлях пераемнасці палітычных, культурных, сацыяльных традыцый - свой, а не навязаны знешнімі сіламі, гістарычны шлях. Шлях, які многім, як вы бачыце, ужо сёння не падабаецца. Але гэта наш шлях, мы яго выбралі. І мы будзем ісці гэтым шляхам, чаго б нам гэта ні каштавала", - сказаў кіраўнік дзяржавы.
Аляксандр Лукашэнка адзначыў, што суверэнітэт і незалежнасць - гэта самае дарагое, што ёсць у любога народа. "Яны дорага каштуюць. І калі мы хочам быць суверэннымі і незалежнымі, нам трэба ісці на гэта, спакойна, без узрушэнняў, не ўступаючы ў канфлікты ні з якімі суседзямі, далёкімі або блізкімі, - нам гэта не трэба, мы мірныя людзі і хочам жыць спакойна. Жыць за свой кошт, сваёй працай, нам чужога не трэба, але свайго мы не аддадзім", - падкрэсліў беларускі лідар.
Ён нагадаў, што на рэспубліканскіх рэферэндумах у 1990-я беларускі народ падтрымаў моўную роўнасць і дату Дня Незалежнасці, зрабіў выбар на карысць моцнай улады, здольнай забяспечыць бяспеку і стабільнасць дзяржаўнага развіцця. "Дзіўна, але апошнім часам усё часцей чую крытыку гэтай формы дзяржаўнага ладу нашай краіны. Я хачу некаторым нагадаць, а моладзь, якая гэтага не ведае, праінфармаваць, што ні я ўзяў і манапалізаваў гэту ўладу, узваліў на свае плечы непасільную ношу. Тады мы ўяўлялі крывавы абрубак вялікай дзяржавы - Савецкага Саюза. Ні грошай, ні мукі, каб спячы хлеб, вакол забастоўкі. І тады я прапанаваў варыянты, не кулуарна, не маючы тады яшчэ ніякай улады. І вы на рэферэндуме, падтрымаўшы мяне, узвалілі на мае плечы гэту ношу. Як магу, так і нясу", - сказаў кіраўнік дзяржавы.
Паводле яго слоў, цяпер многія постсавецкія краіны зайздросцяць беларусам, якія спакойна прайшлі шлях станаўлення. "Сёння некаторым карціць, хочацца перавярнуць, рэформ. Толькі хачу вас папярэдзіць, што ў выніку гэтых рэформ хтосьці наб'е кішэні, а вы зноў з каструлямі будзеце хадзіць з вёсак і сёл у горад-герой Мінск. Паглядзіце на Амерыку - багацейшая краіна. Паглядзіце на Заходнюю Еўропу - ім чаго карціць? Паглядзіце, што робіцца: апошнія падзеі і пандэмія парадзілі ў Злучаных Штатах Амерыкі 60 млн беспрацоўных, галодныя бунты. Мы не Амерыка, мы не друкуем долары. Мы нават не Расія, якой няма куды дзяваць вуглевадароды, золата і металы. У нас толькі рукі, мазгі, галава на плячах. А для гэтага трэба, каб эканоміка ўсяго свету існавала, калі эканоміка ўсяго свету закрыецца, закрыемся і мы, паколькі мы экспартна арыентаваныя, асноўную сыравіну і рэсурсы купляем з-за мяжы", - дадаў Прэзідэнт.
версія для друку
зрабіць стартавай
дабавіць у выбранае