Галоўныя навіны

Лукашэнка адкрыў новую ўзлётна-пасадачную паласу ў Нацыянальным аэрапорце Мінск

3 мая, Мінск /Кар. БЕЛТА/. У Нацыянальным аэрапорце Мінск адкрылі другую штучную ўзлётна-пасадачную паласу. У цырымоніі прыняў удзел Прэзідэнт Беларусі Аляксандр Лукашэнка, перадае карэспандэнт БЕЛТА.

Сімвалічную стужку ва ўрачыстай абстаноўцы перарэзалі кіраўнік дзяржавы Аляксандр Лукашэнка, міністр транспарту і камунікацый Аляксей Аўраменка, генеральны дырэктар Нацыянальнага аэрапорта Мінск Дзмітрый Мелікян. На мерапрыемстве прысутнічалі работнікі аэрапорта, авіякампаніі "Белавія", прадпрыемства "Белаэранавігацыя" і арганізацый, якія ўдзельнічалі ў будаўніцтве новай паласы.

Адкрыццё другой узлётна-пасадачнай паласы Аляксандр Лукашэнка назваў неардынарнай падзеяй. "Многія спецыялісты мяне пераконвалі, што гэта нам не пад сілу, мы гэта не зробім, ніколі не будавалі гэтых палос і трэба мець справу з фірмамі сусветнага ўзроўню. Мы ўжо амаль дамовіліся, але, калі мне прынеслі на подпіс дакумент і там значылася лічба за $600 млн, я сказаў, што тады не трэба нам гэта паласа", - нагадаў перадгісторыю будаўніцтва Прэзідэнт.

Паводле слоў кіраўніка дзяржавы, у хуткім часе ён усё ж такі вырашыў, што новая ўзлётна-пасадачная паласа неабходна, паколькі аэрапорт - гэта твар краіны. Аднак было вырашана, што будаўніцтвам зоймуцца беларускія спецыялісты.

З магчымасцямі новай узлётна-пасадачнай паласы Аляксандр Лукашэнка азнаёміўся яшчэ ў канцы красавіка. Менавіта па ёй самалёт кіраўніка дзяржавы ўзлятаў у напрамку Кітая. На паласу борт нумар адзін садзіўся і пасля вяртання ў Мінск. "Я спытаў свайго пілота, ён кажа: "Я бачыў такую паласу толькі ў Арабскіх Эміратах". Значыць, можам. І пабудавалі мы яе не за $600 млн, а прыкладна ў тры разы танней. Гэта наша найвялікшае дасягненне. Гэта сведчыць аб тым, што мы можам усё, толькі трэба настроіцца на тое, каб гэта зрабіць", - падкрэсліў Прэзідэнт.

Кіраўнік дзяржавы ўспомніў 1990-я гады, калі ў краіне пачыналася павальная прыватызацыя. Многія замежныя інвестары хацелі выкупіць усе аэрапорты краіны. "У іх вока гарэла на гэты аэрапорт. Я адмовіўся ад прыватызацыі ўсіх аэрапортаў, у тым ліку гэтага, - адзначыў Аляксандр Лукашэнка. - Асноўныя вароты краіны павінны належаць дзяржаве".

На думку Прэзідэнта, калі б ў тыя гады Нацыянальны аэрапорт Мінск быў прыватызаваны, то наўрад ці ён развіваўся б такімі тэмпамі.

Аляксандр Лукашэнка падзякаваў будаўнікам за ўзвядзенне новай паласы і парэкамендаваў ім рыхтавацца да яшчэ больш складаных подзвігаў. "Беларусы павінны ў сябе ў доме рабіць усё сваімі рукамі. Мы гэта ўмеем", - заявіў кіраўнік дзяржавы.

Прэзідэнт дадаў, што на адкрыцці новай узлётна-пасадачнай паласы развіццё аэрапорта не скончыцца. "Трэба мадэрнізаваць і далей дабудоўваць для людзей. Нам трэба комплекс гэты да розуму даводзіць. Якую-небудзь фішку нам трэба дабавіць тут. Усё быццам зручна, добра, але няма фішкі, як у іншых дзяржавах", - сказаў Аляксандр Лукашэнка.

У гонар адкрыцця другой узлётна-пасадачнай паласы ад работнікаў аэрапорта кіраўніку дзяржавы паднеслі макет самалёта Boeing 767 300ER - борта нумар адзін.

Прэзідэнт паразмаўляў з працоўнымі калектывамі, падзякаваўшы ім за ўклад у будаўніцтва новай паласы. Аляксандр Лукашэнка пацікавіўся ўмовамі іх работы, памерамі заработнай платы. Ён адзначыў, што з павелічэннем пасажырапатоку будзе і расці зарплата ў работнікаў аэрапорта. "Але галоўнае, каб было стабільна. Як толькі будзе нестабільна - да нас ніхто не прыедзе. Вось гэта трэба помніць", - дадаў кіраўнік дзяржавы.

"Дзякуй вам за тое, што вы зрабілі. Здавалася б, немагчымае, з пункту гледжання нашага ўрада. Малайцы, не падвялі!" - рэзюмаваў Аляксандр Лукашэнка.

Другая штучная ўзлётна-пасадачная паласа ў Нацыянальным аэрапорце Мінск уяўляе сабой комплекс інжынерных збудаванняў, якія ўключаюць непасрэдна саму бетонную паласу даўжынёй 3,7 км і шырынёй 60 м, магістральную і злучальныя рулёжныя дарожкі, грузавы перон, месцы для стаянак самалётаў, кантрольна-прапускныя пункты і іншыя аб'екты інфраструктуры. Праектны кошт узвядзення ўзлётна-пасадачнай паласы перасягнуў Br395 млн, яе будаўніцтва доўжылася тры гады. Новай паласе прысвоена вышэйшая эксплуатацыйная катэгорыя 4F. Гэта дасць магчымасць прымаць аэрапорту паветраныя судны ўсіх тыпаў без абмежаванняў у складаных метэаўмовах.

версія для друку

зрабіць стартавай

дабавіць у выбранае