Галоўныя навіны

25 студзеня, Мінск /Уладзімір Мацвееў - БЕЛТА/. Прэзідэнт Беларусі Аляксандр Лукашэнка сёння на сустрэчы са старшынёй Палаты прадстаўнікоў Нацыянальнага сходу Беларусі Уладзімірам Андрэйчанкам абмеркаваў кадравы патэнцыял палаты парламента, пытанні заканатворчасці і міжнародную дзейнасць, перадае карэспандэнт БЕЛТА.

Кіраўнік дзяржавы пацікавіўся пытаннямі заканатворчай дзейнасці парламента, а таксама папрасіў ахарактарызаваць яго склад з пункту гледжання кадравага патэнцыялу. "Я хацеў бы, каб вы прадставілі мне характарыстыку парламента. Што гэта за парламент, параўнайце з тымі парламентамі, дзе вы працавалі раней. Якая тут тэндэнцыя ў нас, перспектыўныя людзі, - запытаў Аляксандр Лукашэнка. - Вы ведаеце, што парламент - гэта аснова будучага. Тут правяраюцца кадры. Што мы можам тут сказаць і адносна персаналій, калі ёсць такія людзі, якіх мы можам і далей выкарыстоўваць у якасці дзяржаўных служачых на розных пасадах. Таму што ўзровень дэпутата - гэта вельмі высокі ўзровень".

Яшчэ адна тэма, якую абазначыў Прэзідэнт, - гэта вынікі міжнароднай дзейнасці парламентарыяў. Размова не толькі непасрэдна аб міжпарламенцкіх кантактах у частцы заканатворчасці. "Гэта і вялікі эканамічны складнік, ды і дыпламатычны", - звярнуў увагу беларускі лідар.

Нацыянальным сходам Беларусі сфарміраваны 73 рабочыя групы па супрацоўніцтве з парламентамі замежных дзяржаў, 13 дэлегацый для ўзаемадзеяння з міжнароднымі парламенцкімі арганізацыямі, а таксама камісіі па супрацоўніцтве з парламентамі Украіны і Арменіі.

Парламент Беларусі стаў афіцыйна прадстаўлены ў якасці пастаяннага наглядальніка на пасяджэннях Лацінаамерыканскага парламента. Цяпер вядзецца дыялог з Панафрыканскім парламентам і Парламенцкай канферэнцыяй Балтыйскага мора.

Чацвёртая сесія Палаты прадстаўнікоў шостага склікання пачне работу 2 красавіка 2018 года. На сённяшні дзень у пастаянных камісіях палаты для прыняцця ў першым чытанні рыхтуецца 17 праектаў законаў і ў другім - 20 законапраектаў.

Значнае месца займае заканадаўчае забеспячэнне сацыяльна-эканамічнага развіцця краіны ў рэчышчы праграмных дакументаў і ўстановак кіраўніка дзяржавы па павышэнні інвестыцыйнай прывабнасці, разняволенні дзелавой ініцыятывы, стварэнні дастойных умоў жыцця грамадзян. У сувязі з гэтым плануецца завяршыць работу над законапраектамі па пытаннях дзяржаўных закупак, абароны правоў спажыўцоў, пітнога водазабеспячэння, транспартна-экспедыцыйнай і дарожнай дзейнасці.

Павышэнню якасці і канкурэнтаздольнасці беларускіх тавараў будуць садзейнічаць законы аб вытворчасці і абарачэнні арганічнай прадукцыі, аб бяспецы харчовай сыравіны і прадуктаў харчавання, аб бяспецы генна-інжынернай дзейнасці.

Акрамя таго, дапрацоўваецца заканадаўства аб абароне, аб рэгістры насельніцтва, аб абароне дзяржаўных сакрэтаў, аб нарматыўных прававых актах, аб міжнародных дагаворах, аб аўтарскім праве і сумежных правах, аб электронным дакуменце і электронным лічбавым подпісе.

У бліжэйшы час у Палаце прадстаўнікоў плануецца правесці семінар аб эфектыўнасці нарматворчай дзейнасці і парламенцкія слуханні па пытаннях удасканалення энергетычнай галіны.