Галоўныя навіны

28 снежня, Мінск /Кар. БЕЛТА/. Лепшымі спартсменамі 2018 года ў Беларусі прызнаны алімпійская чэмпіёнка Пхёнчхана ў акрабатычных скачках на лыжах Ганна Гуськова і батутыст Уладзіслаў Ганчароў. Традыцыйнае апытанне сярод журналістаў праводзіла газета "Спортивная панорама", паведамляе карэспандэнт БЕЛТА.

Фрыстайлістка ў лютым адыходзячага года парадавала айчынных балельшчыкаў перамогай на зімовых Гульнях, адсвяткаваўшы самы значны поспех у кар'еры. Уладзіслаў Ганчароў у скачках на батуце ў ходзе сезона прадэманстраваў стабільнасць выступлення на міжнароднай арэне на этапах Кубка свету ў індывідуальных скачках, а ў сінхронных разам з Алегам Рабцавым яны выйгралі чэмпіянаты свету і Еўропы, Кубак свету.

Уладзіслаў Ганчароў

У дзясятку лепшых спартсменаў 2018 года, на думку СМІ, таксама ўвайшлі Дар'я Домрачава (біятлон), Настасся Пракапенка (сучаснае пяцібор'е), Арына Сабаленка (тэніс), Вольга Мазуронак (лёгкая атлетыка), Эльвіра Герман (лёгкая атлетыка), Надзея Скардзіна (біятлон), Максім Недасекаў (лёгкая атлетыка), Аляксандра Сасновіч (тэніс). Адзначым, у топ-10 апынуліся адразу тры прадстаўнікі "каралевы спорту".

Лепшай камандай у гульнявых відах спорту па выніках 2018-га прызнана валейбольная "Мінчанка", якая дабілася высокага рэзультату на міжнароднай арэне, заняўшы другое месца ў Кубку Еўрапейскай канфедэрацыі валейбола. Сярод негульнявых відаў лепшай камандай прадказальна прызнаны біятлонны жаночы квартэт - Надзея Скардзіна, Дзінара Алімбекава, Ірына Крыўко і Дар'я Домрачава, які стаў адной з галоўных сенсацый Алімпійскіх гульняў у Пхёнчхане, заваяваўшы залаты медаль. Сярод 100 апытаных журналістаў першае месца страляючым лыжніцам аддаў 91 прадстаўнік СМІ.

Лепшым трэнерам года прызнаны Мікалай Казека (фрыстайл), у тройцы лепшых настаўнікаў Віктар Ганчароў (валейбол, "Мінчанка") і Віктар Ганчарэнка (футбол, маскоўскі ЦСКА).

Конкурс па вызначэнні лепшых атлетаў года газета "Спортивная панорама" праводзіла 60-ы раз у сваёй гісторыі.