Галоўныя навіны

16 кастрычніка, Бурабай /Святлана Саўко - БЕЛТА/. Кіраўнікі дзяржаў СНД адобрылі сёння на саміце зварот у сувязі з 30-й гадавінай аварыі на Чарнобыльскай АЭС, перадае карэспандэнт БЕЛТА.

У звароце падкрэсліваецца даніна памяці загінулым у выніку чарнобыльскай трагедыі, рашучасць і далей прыкладаць намаганні па пераадоленні наступстваў Чарнобыльскай катастрофы. У ім змешчаны заклік усямерна садзейнічаць вырашэнню праблем, звязаных з наступствамі ўдзелу ветэранаў-чарнобыльцаў у ліквідацыі катастрофы.

Наступствы чарнобыльскай катастрофы ўсё яшчэ негатыўна ўплываюць на жыццё часткі насельніцтва, якое пражывае на забруджаных тэрыторыях, і ў сувязі з гэтым вітаюцца намаганні міжнароднай супольнасці, накіраваныя на рэалізацыю праекта па будаўніцтве ахоўных збудаванняў ЧАЭС, адзначаецца ў звароце.

Кіраўнікі дзяржаў СНД канстатавалі, што трэцяе дзесяцігоддзе пасля Чарнобыля, абвешчанае Генеральнай асамблеяй ААН Дзесяцігоддзем рэабілітацыі і ўстойлівага развіцця пацярпелых рэгіёнаў, садзейнічала рэалізацыі міжнародных праграм і праектаў. Яны паспяхова дапоўнілі намаганні ўрадаў пацярпелых дзяржаў у галіне радыеэкалагічнай адукацыі, інфармацыйнага забеспячэння бяспечнага пражывання на тэрыторыях радыеактыўнага забруджвання, а таксама актывізацыі ўдзелу мясцовага насельніцтва ў вырашэнні канкрэтных сацыяльна-эканамічных праблем у рэгіёнах, што пацярпелі ад аварыі на Чарнобыльскай АЭС.

Краіны СНД заклікаюць сусветную супольнасць прадаўжаць супрацоўніцтва па ўстараненні і мінімізацыі прыродных і тэхнагенных выклікаў і пагроз надзвычайнага характару, выкарыстоўваючы паспяхова зарэкамендаваўшыя сябе формы ўзаемадзеяння, што прадугледжваюць рэалізацыю мэтавых праграм, праектаў і ініцыятыў, якія дапаўняюць маштабныя намаганні дзяржаў па далейшым сацыяльна-эканамічным развіцці пацярпелых рэгіёнаў.