Галоўныя навіны
Беларускія байдарачніцы Махнёва і Літвінчук выйгралі золата ЧС у двойцы на 200 м
23 жніўня, Мінск /Кар. БЕЛТА/. Беларускі экіпаж жаночай байдаркі-двойкі ў складзе Маргарыты Махнёвай і Марыны Літвінчук стаў пераможцам чэмпіянату свету-2015 на дыстанцыі 200 м у італьянскім Мілане, паведамляе карэспандэнт БЕЛТА.
У неалімпійскім класе К2 на 200 м Махнёва і Літвінчук першынствавалі з рэзультатам
38,477 сек. Серабро выйграў экіпаж з Венгрыі (38,659 сек), бронзу - спартсменкі з Германіі (39,659 сек).Яшчэ ў адным неалімпійскім класе мужчынскіх каноэ-двоек (С2) на дыстанцыі 200 м сярэбранымі прызёрамі сусветнага форуму сталі беларусы Глеб Саладуха і Дзяніс Махлай (рэзультат - 37,516 сек). На фінішы яны прайгралі 1,169 сек чэмпіёнам свету расіянам Аляксею Каравашкаву і Івану Штылю (36,347 сек). Замкнуў жа прызавую тройку нямецкі экіпаж Роберт Нук / Штэфан Хольтц (37,750 сек).
Уладальніцай яшчэ адной узнагароды стала Каміла Бобр. Яна прыйшла трэцяй да фінішу ў класе каноэ-адзіночак (С1) на дыстанцыі 200 м з рэзультатам 49,225 сек, уступіўшы пры гэтым 0,508 сек пераможцы вырашальнага заезду балгарцы Станіліі Стаменавай (48,717 сек). Серабро тут дасталося венгерцы Кінжа Такаш (48,817 сек).
версія для друку
зрабіць стартавай
дабавіць у выбранае