4 лютага, Мінск /Аліна Грышкевіч - БЕЛТА/. Беларусь ужо запрасіла некаторыя міжнародныя арганізацыі і краіны для ўдзелу ў мерапрыемствах, прысвечаных 30-годдзю аварыі на ЧАЭС. Аб гэтым паведаміў сёння на брыфінгу начальнік упраўлення інфармацыі - прэс-сакратар МЗС Дзмітрый Мірончык, перадае карэспандэнт БЕЛТА.
Цяпер актыўна вядзецца падрыхтоўка да мерапрыемстваў, прымеркаваных да гэтай даты. Асноўным іх арганізатарам з'яўляецца МНС. МЗС удзельнічае ў рамках сваёй кампетэнцыі, удакладніў Дзмітрый Мірончык. У прыватнасці, ужо накіраваны запрашэнні прыняць удзел у маючых адбыцца мерапрыемствах, у тым ліку міжнародных канферэнцыях, кіраўнікам міжнародных агенцтваў. У іх ліку МАГАТЭ, Сусветная арганізацыя аховы здароўя, Дзіцячы фонд ААН (ЮНІСЕФ). Запрашэнні накіраваны таксама краінам-донарам, якія прымаюць актыўны ўдзел у дапамозе пацярпелым раёнам Беларусі, - Японіі, Германіі, Італіі і іншым.
"Запрошаны Расія і Украіна, як найбольш пацярпелыя ад аварыі на ЧАЭС краіны", - адзначыў прэс-сакратар МЗС. Чакаецца ўдзел у мерапрыемствах і іншых дзяржаў, якія непасрэдна займаюцца чарнобыльскай праблематыкай і чый уклад важны ў распрацоўку новай чарнобыльскай стратэгіі ААН. Плануецца, што новая стратэгія будзе прынята ААН на сесіі Генеральнай асамблеі восенню 2016 года.