Галоўныя навіны
Беларус Ігнат Галавацюк выйграў залаты медаль юніёрскага ЧС па канькабежным спорце
11 сакавіка, Мінск /Кар. БЕЛТА/. Беларус Ігнат Галавацюк выйграў залаты медаль юніёрскага чэмпіянату свету па канькабежным спорце на дыстанцыі 500 м і ўстанавіў новы рэкорд Беларусі ў спрынце, паведамляе карэспандэнт БЕЛТА.
Турнір, які праходзіць у кітайскім Чанчуні, стартаваў сёння з розыгрышаў медалёў у спрынце на 500 м сярод юнакоў. Ігнат Галавацюк з'яўляўся адным з прэтэндэнтаў на ўзнагароды і выходзіў на старт у мацнейшай групе. У забегу з эстонцам Мартэнам Ліівам беларус змог паказаць вынік 35,72 сек, што з'яўляецца новым дасягненнем Беларусі сярод мужчын на гэтай дыстанцыі. Ранейшы рэкорд (36,77 сек) пратрымаўся крыху больш за месяц, быў устаноўлены 5 лютага ў Мінску і таксама належаў Ігнату Галавацюку.
Асноўныя канкурэнты беларуса ў спрынце на юніёрскім сусветным форуме выступалі пасля яго, але ні канадзец Крыстафер Фіёла - 35,97 сек, які заняў другое месца, ні кітаец Таа Янг - 36,03 сек (трэцяе месца), што былі ў адной пары, не змаглі перасягнуць вынік Ігната Галавацюка. Поспех на сусветным форуме для беларускага спартсмена не першы. Раней ён заваяваў серабро на юніёрскім этапе Кубка свету, які таксама прайшоў у Чанчуні.
Лукашэнка павіншаваў Ігната Галавацюка з золатам юніёрскага чэмпіянату свету па канькабежным спорце
11 сакавіка, Мінск /Кар. БЕЛТА/. Прэзідэнт Беларусі, Прэзідэнт Нацыянальнага алімпійскага камітэта Аляксандр Лукашэнка павіншаваў члена нацыянальнай каманды Беларусі па канькабежным спорце Ігната Галавацюка з заваяваннем золата на юніёрскім чэмпіянаце свету ў кітайскім Чанчуні. Аб гэтым БЕЛТА паведамілі ў прэс-службе кіраўніка дзяржавы.
"Табе пакарылася важная для нашай краіны вяршыня. Гэты медаль і апошнія рэзультаты юніёрскай каманды даюць балельшчыкам надзею на адраджэнне ў Беларусі слаўных традыцый канькабежнага спорту", - гаворыцца ў віншаванні.
Аляксандр Лукашэнка таксама падзякаваў трэнерам і членам каманды.
"Шчыра жадаю ўсім вам моцнага здароўя, шчасця і выдатных перамог на лядовых дарожках свету!" - пажадаў Прэзідэнт.
версія для друку
зрабіць стартавай
дабавіць у выбранае