Гуманітарнае супрацоўніцтва

В'етнаму перададзены накіраваны па даручэнні Лукашэнкі гуманітарны груз

Фота Пасольства Рэспублікі Беларусь у Сацыялістычнай Рэспубліцы В'етнам

12 чэрвеня, Мінск /Кар. БЕЛТА/. Гуманітарная дапамога, накіраваная па даручэнні Прэзідэнта Рэспублікі Беларусь Аляксандра Лукашэнкі пацярпелым ад маштабных паводак цэнтральным раёнам В'етнама, перададзена 11 чэрвеня ў марскім порце Дананга. Аб гэтым карэспандэнту БЕЛТА паведамілі ў беларускім знешнепалітычным ведамстве.

Груз у складзе тавараў беларускай вытворчасці масай каля 27 т прыняло кіраўніцтва дэпартамента па кіраванні дамбамі і прадухіленні стыхійных бедстваў Міністэрства сельскай гаспадаркі і навакольнага асяроддзя В'етнама.

Саветнік-пасланнік беларускага пасольства Алег Шлома адзначыў, што В'етнам можа заўсёды разлічваць на братэрскую дапамогу Беларусі ў ліквідацыі наступстваў стыхійных бедстваў і надзвычайных сітуацый. Беларускі дыпламат выказаў надзею, што для многіх пацярпелых в'етнамскіх сем'яў дастаўлены груз стане істотнай дапамогай, а прадаўжэнне добрай традыцыі ўнясе важны ўклад у далейшае ўмацаванне ўстаноўленага ў маі 2025 года стратэгічнага партнёрства паміж дзяржавамі і дружбы паміж народамі, будзе садзейнічаць развіццю міжрэгіянальных сувязей і кантактаў паміж людзьмі.

У мерапрыемстве таксама прынялі ўдзел кіраўніцтва найбольш пацярпелай ад паводак правінцыі Куангчы, прадстаўнікі в'етнамскіх мытных і міграцыйных органаў, СМІ.

версія для друку

зрабіць стартавай

дабавіць у выбранае