Гуманітарнае супрацоўніцтва

Сіняўскі: МНС Беларусі гатова забяспечыць гуманітарную дапамогу любой краіне ў выпадку надзвычайных сітуацый

4 лютага, Мінск /Кар. БЕЛТА/. МНС Беларусі гатова забяспечыць гуманітарную дапамогу замежным краінам у выпадку надзвычайных сітуацый. Аб гэтым заявіў журналістам міністр па надзвычайных сітуацыях Вадзім Сіняўскі па выніках даклада Прэзідэнту, перадае карэспандэнт БЕЛТА.

Міністр адзначыў, што гуманітарнае рэагаванне ажыццяўляецца Беларуссю ў інтарэсах розных дзяржаў свету. "У нас створаны ўсе ўмовы, каб пры неабходнасці забяспечыць належную гуманітарную дапамогу любой краіне, якая пацярпела ад тых ці іншых надзвычайных сітуацый", - сказаў ён.

"Міністэрства як каардынатар гэтай работы мае ўсе неабходныя рэсурсы для аператыўнага збору гуманітарнай дапамогі з усімі зацікаўленымі, а таксама арганізацыі дастаўкі ў любую краіну свету, калі гэта спатрэбіцца, і прадстаўленне Рэспублікі Беларусь у любых пытаннях, звязаных з рэагаваннем на надзвычайныя сітуацыі", - адзначыў Вадзім Сіняўскі.

"Для гэтага ў нас ёсць рэспубліканскі атрад спецыяльнага прызначэння, які прайшоў у мінулым годзе акрэдытацыю па стандартах ААН. Ён акрэдытаваны як пошукава-выратавальны атрад цяжкага класа і гатовы выканаць любую пастаўленую задачу. У інтарэсах краіны мы сфарміравалі сваё няштатнае падраздзяленне па прынцыпе нашага атрада, якое здольна вырашаць задачы ў ліквідацыі любой надзвычайнай сітуацыі на нашай тэрыторыі, а калі спатрэбіцца, і за мяжой", - расказаў міністр.

версія для друку

зрабіць стартавай

дабавіць у выбранае